Кандыдат на прэзідэнцтва ад кіроўнай кааліцыі Рафал Тшаскоўскі заявіў, што ўсходняя мяжа Польшчы мусіць быць «самай бяспечнаю ў Еўропе», бо гэта мяжа «паміж светам дэмакратыі і светам дэспатыі».
Мэр Варшавы, кандыдат на прэзідэнцтва ад Грамадзянскай кааліцыі цяперашняга прэм'ер-міністра Польшчы Дональда Туска, Рафал Тшаскоўскі зладзіў перадвыбарчы мітынг у польскім горадзе Еленя Гура 12 красавіка.
Як паведамляе Польскае прэсавае агенцтва (PAP), палітык заявіў пра неабходнасць скасаваць «сярэдневяковы закон супраць абортаў» і стымуляваць нараджальнасць іншымі захадамі.
Разважаючы пра сучасныя выклікі, Тшаскоўскі загаварыў пра бяспеку. Ён заявіў, што ўсходняя мяжа Польшчы мусіць быць сёння самай бяспечнай мяжою ў Еўропе:
,,«Гэта мяжа паміж двума светамі, паміж светам дэмакратыі і светам дэспатыі. Сёння на нашай мяжы трывае цывілізацыйная вайна і вырашаецца, будзем мы ў бяспецы ці не».
Палітык таксама адзначыў, што Еўразвяз мусіць зрабіцца наймацнейшай апораю NATO: «Мы маем велізарны шанец зрабіцца сувязным звяном паміж ЕЗ і ЗША. Мы будзем моцнымі, калі сапраўды зробім гэта».
Выбары прэзідэнта Польшчы адбудуцца 18 траўня. Аднак, мяркуючы з вынікаў апытанняў, нашым суседзям спатрэбіцца другі тур, каб вызначыць наступнага кіраўніка дзяржавы. Галасаванне ў другім туры мае прайсці 1 чэрвеня.
Фаварытам гонкі пакуль застаецца Рафал Тшаскоўскі. Паводле нядаўняга даследавання, праведзенага «Opinia24» на замову радыёстанцыі «RMF FM», яго гатовыя падтрымаць 31,5 % палякаў.
Другім ідзе кандыдат ад партыі «Закон і справядлівасць», якая перайшла ў апазіцыю пасля парламенцкіх выбараў у кастрычніку 2023 года, Караль Наўроцкі. Ён кіруе Інстытутам нацыянальнай памяці. За гэтага кандыдата гатовыя прагаласаваць 20 % грамадзянаў.
14,7 % мае прадстаўнік крайне правай «Канфедэрацыі» Славомір Мэнцэн. Чацвёртым ідзе старшыня Сейму, кіраўнік партыі «Польшча-2050» Шыман Галоўня, яго гатовыя падтрымаць 5,8 % выбарнікаў.
Іншае апытанне, праведзенае Цэнтрам даследавання грамадскай думкі (CBOS), дае Тшаскоўскаму лепшы вынік: 33 %. У Наўроцкага – 25 %, у Мэнцэна – 16 %, у Галоўні – 4 %.
Дарэчы, абодва даследаванні сведчаць пра падзенне за апошнія тыдні папулярнасці «канфедэрата» Мэнцэна, які раней мог прэтэндаваць на другое месца ў першым туры і суперніцтва з Тшаскоўскім – у другім.
Для перамогі ў першым туры выбараў прэзідэнта Польшчы трэба набраць больш за 50 % галасоў выбарнікаў. Калі гэта не адбываецца, то два кандыдаты, якія атрымалі найбольшую колькасць галасоў, праходзяць у другі тур, дзе пераможа той, хто набярэ больш за канкурэнта.
Зрэшты, як адзначаў журналіст выдання «Rzeczpospolita» Руслан Шошын у сваёй калонцы на старонцы «Белсату», з новым прэзідэнтам палітыка Польшчы ў дачыненні Беларусі наўрад ці зменіцца:
«У Польшчы існуе кансэнсус (не лічачы некалькіх прарасейскіх і пралукашэнкаўскіх маргінальных групаў) у дачыненні беларускага пытання. І Лукашэнка не зрабіў дагэтуль ніводнага кроку, каб прадэманстраваць жаданне змяніць сітуацыю ў лепшы бок. Галоўнае патрабаванне Варшавы – вызваленне палітвязняў, у тым ліку журналіста і аднаго з лідараў польскай меншасці Анджэя Пачобута».
Пра такі міжпартыйны кансэнсус сведчыць і ўхваленне польскім Сеймам 4 красавіка сёлета рэзалюцыі наконт апошніх прэзідэнцкіх «выбараў» у Беларусі. За гэты дакумент прагаласаваў 431 дэпутат з 433 абраннікаў.
У рэзалюцыі адзначаецца, што вынікі «выбараў» не адпавядаюць міжнародным дэмакратычным стандартам і не могуць быць «надзейным адлюстраваннем палітычнай волі беларускага народу».
Таксама Сейм выступіў супраць абмежавання асноўных грамадзянскіх правоў і свабодаў у Беларусі, а таксама супраць пераследу прадстаўнікоў апазіцыі, незалежных журналістаў і грамадзянскай супольнасці.
Акрамя таго, рэзалюцыя вызначае, што свабодная і суверэнная Беларусь – адзін з галоўных чыннікаў стабільнасці і бяспекі ў рэгіёне.
Сцяпан Кубік belsat.eu
