У Беларусі не змяншаюцца рэпрэсіі, а, наадварот, растуць. Да такой высновы прыйшлі аўтары тэлеграм-каналу «Суды, задержания. Гродно и область». Праваабаронцы прааналізавалі статыстыку паводле палітычна матываваных затрыманнях і судах у перыяд з студзеня 2023 года да сакавіка 2025 года.
У аналізе ўлічваліся суды першай інстанцыі паводле шэрагу «палітычных» артыкулаў – як крымінальных, так і адміністратыўных. На падставе статыстычных звестак аналітыкі склалі графікі.
«Агульны трэнд – на рост. Пункцірныя лініі на абодвух графіках паказваюць агульную тэндэнцыю. І для крымінальных, і для адміністратыўных справаў яна, на жаль, скіраваная ўверх. Гэта значыць, што ў сярэднім судоў паводле гэтых артыкулаў робіцца больш», – тлумачаць аўтары інфаграфікі.
Палітычна матываваны крымінальны пераслед не спыняецца і паказвае «стабільную працу» паводле артыкулаў 342 («Арганізацыя ці ўдзел у дзеяннях, што груба парушаюць грамадскі парадак»), 361 («Заклікі да санкцыяў»), 368 («Знявага прэзідэнта»), 369 («Знявага прадстаўніка ўлады»), 130 («Распальванне варожасці») і інш.
Сярэдняя штомесячная колькасць судоў паводле пералічаных артыкулаў перавышае 70.
,,«Прычым, за апошнія два гады стабільна кожны месяц праводзяцца 50+ новых судоў. Самы «папулярны» артыкул – 342, паводле якога штомесяц было 30+ судоў», – зазначаюць праваабаронцы.
Масавы характар захоўваюць адміністратыўныя справы – іх колькасць вымяраецца сотнямі ў месяц, што, паводле аўтараў тэлеграм-каналу, «гаворыць пра няспынны канвеер затрыманняў, штрафаў і арыштаў за любую форму іншадумства».
Пераважае сярод адміністратыўных артыкул 19.11 КоАП – «Захоўванне і распаўсюд экстрэмісцкіх матэрыялаў».
«Рэпрэсіі – гэта не старонка гісторыі, якую перагарнулі. Гэта штодзённая рэчаіснасць для шмат каго ў Беларусі, і гэтая рэчаіснасць, мяркуючы з лічбаў, робіцца толькі больш суворай», – рэзюмуюць аўтары аналітыкі.
Праваабаронцы нагадваюць, што часта адпраўным пунктам для рэпрэсіяў служаць лічбавыя сляды, таму просяць сачыць за бяспекаю – сваёй і родных.
Марыя Міхалевіч belsat.eu
