Анджэй Дуда 26 сакавіка падпісаў Закон аб часовым і тэрытарыяльным абмежаванні права на прыём прашэнняў аб міжнароднай абароне.
Гэты закон скіраваны на ўзмацненне бяспекі польска-беларускай мяжы і абмежаванне права на міжнародную абарону.
«Сёння я прыняў пастанову аб набыцці моцы так званага закона аб прытулку. Я падпісаў яго, бо лічу неабходным узмацніць бяспеку нашых межаў. Я заклікаю прэм'ер-міністра зрабіць актыўныя крокі для развязання праблемаў бяспекі Польшчы», — цытуе Анджэя Дуду «onet.pl».
Учора, 25 сакавіка, прэм'ер-міністр Доналд Туск у чарговы раз заявіў, што не разумее, чаму прэзідэнт да гэтага часу не падпісаў закон аб абмежаванні права на прытулак.
«Новыя правілы адразу палепшаць сітуацыю на мяжы з Беларуссю. Калі ласка, не губляйце ні гадзіны, спадар прэзідэнт», — заклікаў кіраўнік ураду.
Дуда ў адказ скіраваў Туску свае пытанні, датычныя памежнай дзейнасці прэм’ера Польшчы, але і нашумелы Закон усё ж такі падпісаў.
Нагадаем, Сенат Польшчы 13 сакавіка не ўнёс аніякіх зменаў у праект Закону аб наданні абароны замежнікам. Закон прадугледжвае перыяд абмежавання права на прыём прашэнняў аб міжнароднай абароне, што не можа перавышаць 60 дзён, аднак можа быць працягнуты яшчэ на 60 дзён паводле ўхвалення Сейму.
Памежная служба, нягледзячы на абмежаванні, будзе прымаць заявы аб міжнароднай абароне ад няпоўнагадовых без суправаджэння дарослых, цяжарных жанчын і асобаў, якім можа спатрэбіцца адмысловае стаўленне, асабліва праз іхны век або стан здароўя. Абмежаванне не будзе датычыць чалавека, якому, на думку памежнай службы, «сапраўды пагражае сур'ёзная шкода ў краіне, з якой ён ці яна непасрэдна прыбылі ў Польшчу».
Бальшыню беларусаў новаўвядзенні не павінны датычыць. Кіраўніца ініцыятывы «Partyzanka» Ганна Маціеўская раней падкрэслівала, што праект прадугледжвае беспасярэдняе выключэнне для грамадзянаў Беларусі. То бок беларусы змогуць надалей падаваць заявы на абарону ў памежнай зоне, адзначала яна.
Тэса Анэйда / belsat.eu
