Кіраўніца ініцыятывы «Partyzanka» Ганна Маціеўская пракаментавала ўхвалены большасцю дэпутатаў польскага Сейма закон аб часовым і тэрытарыяльным абмежаванні права на прыём прашэнняў аб міжнароднай абароне. Беларусам няма чаго хвалявацца, але ёсць нюанс.
Новы польскі законапраект датычыцца «прыпынення права на прытулак у прыгранічнай зоне». Згодна з ім уводзіцца магчымасць часова (да 60 дзён) і тэрытарыяльна абмяжоўваць прыём заявак пра наданне міжнароднай абароны.
Як адзначае Ганна Маціеўская, у шматлікіх беларусаў узнікла пытанне аб тым, як уцякаць з краіны ў выпадку рэпрэсій.
Але, паводле юрысткі, панікаваць не варта: праект прадугледжвае прамое выключэнне для грамадзян Рэспублікі Беларусь.
,,«То бок беларусы змогуць па-ранейшаму падаваць заявы на абароны ў прыгранічнай зоне», – напісала кіраўніца ініцыятывы «Partyzanka» на сваёй старонцы ў «Facebook».
Тым не менш не абышлося без нюансаў. Дадзенае выключэнне, напісала Маціеўская, «не будзе працаваць у выпадку, калі ў дачыненні да беларуса спатрэбілася прымяніць меры прамога прымусу, зброю або ўзбраенне, непасрэдна пасля перасячэння (або спробы перасячэння) мяжы з прымяненнем гвалту і ва ўзаемадзеянні з іншымі асобамі».
Такой катэгорыі асобаў будзе адмоўлена ў прыняцці заявы на міжнародную абарону (уцякацтва), адзначыла юрыстка.
Нагадаем, што законапраект быў разгледжаны ў польскім Сейме 21 лютага. Падчас разгляду была падтрыманая папраўка, якая забараняе разлучэнне сем’яў на мяжы. Памежная служба цяпер не можа адмовіць у прыняцці заяваў ад прадстаўнікоў уразлівых групаў, да іх адносяцца цяжарныя жанчыны, непоўнагадовыя без апекі і асобы, якія маюць патрэбу ў асаблівым абыходжанні.
Перыяд абмежавання права на прыём прашэнняў аб міжнароднай абароне не можа перавышаць 60 дзён, аднак ён можа быць працягнуты яшчэ на 60 дзён паводле ўхвалення Сейму.
Законам таксама прадугледжанае пашырэнне падставаў для пазбаўлення статусу ўцекача. Пасля таго, як законапраект набудзе моц, страціць прытулак могуць асобы, якія нясуць пагрозу дзяржаўнай бяспецы, а таксама замежнікі, якія маюць прысуд за здзяйсненне асабліва цяжкіх злачынстваў.
Неўзабаве законапраект мусіць паступіць на разгляд польскага Сенату.
Раман Шавель belsat.eu
