Сенат Польшчы 13 сакавіка не ўнёс ніякіх зменаў у праект Закону аб наданні абароны замежнікам. Дакумент прадугледжвае магчымасць часовага і тэрытарыяльнага абмежавання права на прытулак.
Законапраект прадугледжвае, што абмежаванні права падачы заявы аб міжнароднай абароне могуць быць уведзеныя пастановай ураду на запыт міністра ўнутраных справаў і адміністрацыі. Яе ўвядзенне мае ўлічваць «неабходнасць не дапусціць дэстабілізацыі ўнутранай сітуацыі» ў краіне і быць скіраваная на «мінімальнае абмежаванне правоў замежнікаў, якія маюць намер звярнуцца па міжнародную абарону», перадае PAP.
Згодна з папраўкамі, абмежаванне будзе часовае, і працягласць абмежавання не можа перавышаць 60 дзён за раз. Тэрмін дзеяння абмежавання можа быць прадоўжаны на пэўны тэрмін, але не больш як на 60 дзён, са згоды Сейма. У пастанове таксама мае быць указаны ўчастак мяжы, на якім дзеіць абмежаванне.
Памежная служба, нягледзячы на абмежаванні, будзе прымаць заявы аб міжнароднай абароне ад няпоўнагадовых без суправаджэння дарослых, цяжарных жанчын і асобаў, якім можа спатрэбіцца адмысловае стаўленне, асабліва праз іхны век або стан здароўя. Абмежаванне не будзе датычыць чалавека, калі, на думку памежнай службы, абставіны «відавочна даказваюць, што яму ці ёй сапраўды пагражае сур'ёзная шкода ў краіне, з якой ён ці яна непасрэдна прыбылі ў Польшчу».
Віцэ-маршалак Мацей Жыўна прапанаваў унесці ў дакумент праўкі, якія б пашыралі ўразлівую групу на ўсіх няпоўнагадовых, а не толькі на тых, хто без суправаджэння дарослых. Але такой папраўкі не зацвердзілі.
Намеснік кіраўніка Міністэрства ўнутраных справаў і адміністрацыі Мацей Душчык, прэзентуючы дакумент, падкрэсліў, што ён закліканы развязаць праблему міграцыйнага ціску на польска-беларускай мяжы.
,,«Гэта людзі, якія, натуральна, не дасягнулі б тэрыторыі Польшчы без супрацы з урадамі Расеі і Беларусі», – растлумачыў ён.
Юрысты і праваабаронцы занепакоеныя
Раней заканадаўчае бюро Сенату заявіла, што гэты закон выклікае занепакоенасць з нагоды яго адпаведнасці артыкулу 56(1). 2 Канстытуцыі ў звязку з часовым пазбаўленнем замежніка права звяртацца па міжнародную абарону. Таксама адзначалася, што існуе рызыка парушэнняў такіх міжнародных інструментаў, як Жэнеўская канвенцыя аб статусе ўцекачоў, Еўрапейскай канвенцыі аб абароне правоў чалавека і асноўных свабодаў і пратаколаў да яе, а таксама Хартыі ЕЗ аб асноўных правах.
Негатыўныя думкі таксама выказалі прадстаўнікі Упраўлення вярхоўнага камісара ААН у справах уцекачоў, Арганізацыя «Save The Children Polska», Упраўленне омбудсмана ў справах дзяцей, Хельсінкскі фонд правоў чалавека ды іншыя.
Кіраўніца ініцыятывы «Partyzanka» Ганна Маціеўская раней падкрэслівала, што праект прадугледжвае беспасярэдняе выключэнне для грамадзянаў Беларусі. То бок беларусы змогуць надалей падаваць заявы на абарону ў памежнай зоне, адзначала яна.
Якуб Хруст belsat.eu
