Вайна

Расея атакуе ТЦК і спрабуе прарвацца да Пакроўску. Што адбываецца на вайне ва Украіне

Разбураныя жылыя дамы бачныя з машыны вайскоўцаў, якія праязджаюць каля Пакроўску позна ўвечары. Данецкая вобласць, Украіна. 27 траўня 2025 года. Фота: Jose Colon / Anadolu via Getty Images
Разбураныя жылыя дамы бачныя з машыны вайскоўцаў, якія праязджаюць каля Пакроўску позна ўвечары. Данецкая вобласць, Украіна. 27 траўня 2025 года. Фота: Jose Colon / Anadolu via Getty Images
podpis źródła zdjęcia

Войскі Расеі працягваюць атакаваць украінскія гарады і вёскі, спрабуючы зайсці ў новыя рэгіёны. Пры гэтым актыўным атакам падвяргаюцца і тэрытарыяльныя цэнтры камплектавання (ТЦК) – украінскія аналагі ваенкаматаў. ЗША тым часам абвясцілі пра аднаўленне паставак узбраення Кіеву.

Пасля тыднёвага прыпынення паставак узбраення прэзідэнт Злучаных Штатаў Доналд Трамп заявіў, што Украіна мусіць быць у стане сябе абараніць, а таму Вашынгтону «давядзецца адправіць больш зброі, найперш абарончай». У Пэнтагоне таксама запэўнілі, што на загад Трампа адправяць ва Украіну дадатковую зброю, каб украінцы маглі абараніцца, пакуль «працягваюцца намаганні ў забеспячэнні трывалага міру». Зрэшты, у ЗША не ўдакладнілі, якую менавіта зброю атрымае Кіеў. Расея ж тым часам працягвае намаганні захапіць як мага больш украінскай тэрыторыі.

Чытайце таксама:
Дрон-камікадзэ «Shahed-136». Фота: mil.in.ua

У ноч на 8 ліпеня ў Беларусь заляцелі больш за 10 беспілотнікаў

Найбольшае прасоўванне ў 2025 годзе

За чэрвень, паводле ацэнак украінскага сэрвісу «Deep State», РФ захапіла ва Украіне 556 квадратных кіламетраў, што ёсць найбольшым паказнікам у 2025 годзе і агулам з лістапада 2024 года. У Генеральным штабе Украіны адзначаюць, што ў чэрвені Расея спрабавала разбалансаваць украінскую абарону, павялічвала інтэнсіўнасць і колькасць удараў, імкнулася расцягнуць лінію баявога сутыкнення.

Паводле Генштабу, найбольш пагрозлівае сітуацыя на паўночнаслабажанскім (Сумская вобласць), дабрапольскім, пакроўскім (Данецкая) і новапаўлаўскім (Данеччына і Днепрапятроўшчына) кірунках, «дзе вораг засяроджвае свае асноўныя намаганні, стварыў найбольшую канцэнтрацыю войскаў і, на жаль, адчувальна пераважае ў сілах і сродках». Таксама расейскія войскі ў чэрвені ў 1,6 разы павялічылі колькасць ракет і дронаў, выпушчаных па тэрыторыі Украіны.

Людзі хаваюцца ў падвале ад удару расейскіх БпЛА ў Харкаве. У выніку расейскіх удараў па ўсёй Украіне за ноч загінулі як мінімум чатыры чалавекі і больш за 30 атрымалі раненні, паведамілі рэгіянальныя чыноўнікі Украіна. Харкаў, Украіна. 7 ліпеня 2025 года. Фота: Sergey Bobok / AFP / East News
Людзі хаваюцца ў падвале ад удару расейскіх БпЛА ў Харкаве. У выніку расейскіх удараў па ўсёй Украіне за ноч загінулі як мінімум чатыры чалавекі і больш за 30 атрымалі раненні, паведамілі рэгіянальныя чыноўнікі Украіна. Харкаў, Украіна. 7 ліпеня 2025 года. Фота: Sergey Bobok / AFP / East News

Як заяўляецца, украінскія войскі «вымушаныя звяртацца да сіметрычных і асіметрычных хадоў, шукаць новыя тактычныя і тэхналагічныя рашэнні для процідзеяння акупантам», у тым ліку наносячы ўдары па вайсковых і лагістычным цэлях у глыбіні тэрыторыі Расеі.

Расея працягвае захопліваць тэрыторыі, часам – на паперы

За першы тыдзень ліпеня, адзначае «Deep State», расейскія войскі здолелі захапіць сёла Мелавое і Строеўка (Купянскі раён Харкаўскай вобласці), Новаўкраінка, Зялёны Кут і Піддубнэ (Валнавахскі раён Данецкай вобласці), Лабковэ (Васільеўскі раён Запарожскай вобласці), а таксама прасунуліся ў шэрагу іншых мясцовасцях. Як падлічыла «Агентство», за тыдзень з 30 чэрвеня па 5 ліпеня расейскія войскі захапілі ва Украіне 203 квадратныя кіламетры – гэта рэкордны паказнік з сярэдзіны лістапада 2024 года.

Таксама 7 ліпеня расейскае Мінабароны заявіла пра захоп першага населенага пункту Днепрапятроўскай вобласці – вёскі Дачнэ. У пацверджанне сваіх слоў расейскія вайскоўцы апублікавалі відэа тыднёвай даўнасці. У сваю чаргу ў ЗСУ заявілі аб поўным вызваленні Дачнага, адзначыўшы, што ў вёску сапраўды заходзіла невялікая выведгрупа УС РФ, якая паспела сфатаграфавацца са сцягам і была знішчаная. Украінскія вайскоўцы таксама апублікавалі свяжэйшае відэа, дзе два ўкраінскія вайскоўцы ўздымаюць сцяг над адным з дамоў у заходняй частцы невялікага сяла. На расейскім відэа гэты ж дом быў яшчэ цэлым, на ўкраінскім – ён ужо разбураны.

Энергетыкі энергетычнай кампаніі ДТЭК рамантуюць лініі электраперадачы, пашкоджаныя расейскімі абстрэламі, у полі ў 6 км ад лініі фронту, побач з ахоўным сеткавым калідорам, які быў расцягнуты над дарогай для абароны ад падзення расейскіх беспілотнікаў FPV. Данецкая вобласць, Украіна. 12 чэрвеня 2025 года. Фота: Andriy Kramchenkov / Suspilne Ukraine / JSC «UA:PBC» / Global Images Ukraine via Getty Images
Энергетыкі энергетычнай кампаніі ДТЭК рамантуюць лініі электраперадачы, пашкоджаныя расейскімі абстрэламі, у полі ў 6 км ад лініі фронту, побач з ахоўным сеткавым калідорам, які быў расцягнуты над дарогай для абароны ад падзення расейскіх беспілотнікаў FPV. Данецкая вобласць, Украіна. 12 чэрвеня 2025 года. Фота: Andriy Kramchenkov / Suspilne Ukraine / JSC «UA:PBC» / Global Images Ukraine via Getty Images
Станам на раніцу 8 ліпеня, паводле Генштабу ЗСУ, найбольш гарачымі напрамкамі ёсць пакроўскі, ліманскі, новапаўлаўскі, паўночнаслабажанскі. Толькі за мінулыя содні адбылося 188 баявых сутыкненняў, падчас якіх «акупанты страцілі больш як тысячу сваіх жаўнераў».
,,

«Акцэнтаваў на дзеяннях нашых падраздзяленняў у актыўнай абароне – на недапушчэнні прасоўвання праціўніка ў глыбіню нашай абароны на пакроўскім і новапаўлаўскім напрамках і выхад на адміністрацыйныя межы Днепрапятроўскай вобласці. Паказаў на аднаўленне пазіцыяў і ўтрыманне тэрыторый у Курскай і Белгародскай вобласцях Расеі. Працягваем скоўваць у памежжы значную групу праціўніка. Вораг не будзе ў спакоі», – паведаміў Галоўнакамандуючы ЗСУ Аляксандр Сырскі.


Чытайце таксама:
Галоўнакамандуючы ЗСУ Аляксандр Сырскі. Фота: Головнокомандувач ЗС України / CinC AF of Ukraine / Facebook

Беларус з Чавускага раёну. Што вядома пра дзеда Галоўнакамандуючага ЗСУ

У Міністэрстве абароны Расеі ў сваю чаргу заявілі 8 ліпеня, што за мінулыя содні палепшылі тактычнае становішча ў Сумскай вобласці і «па пярэднім краі» групоўкі войскаў «Захад», а падраздзяленні «Паўднёвай» групоўкі войскаў «занялі больш выгадныя рубяжы і пазіцыі». Група войскаў «Цэнтр» палепшыла тактычнае становішча, а «Усход» працягнуў «прасоўванне ў глыбіню абароны праціўніка». Як заяўляецца, ЗСУ ў абароне страцілі больш як 1300 вайскоўцаў, што ў 1,3 разы больш, чым расейскія вайскоўцы падчас наступу паводле звестак украінскага боку. Што з'яўляецца нелагічным ва ўмовах больш-менш стабільнага фронту. Звычайна найбольшыя страты нясуць тыя, хто наступае.

Пакроўск і Мірнаград пад пагрозай

Амерыканскі Інстытут вывучэння вайны (ISW) мяркуе, што расейскія сілы «пераразмяркоўваюць прыярытэты наступальных аперацыяў у кірунку Пакроўску з кірунку Канстанцінаўкі пасля некалькіх тыдняў беспаспяховай актыўнасці, накіраванай на прасоўванне да Канстанцінаўкі». Таксама расейскія сілы пераарыентуюць сваю ўвагу на раён на паўночны ўсход ад Пакроўску ў напрамку Дабраполля. Зніжаюцца наступальныя дзеянні дзеля наступу на Пакроўск і на захад ад Тарэцку.

,,

«Гэтыя наступы падтрымліваюць як ахоп Пакроўску, гэтак і стварэнне выступу, які дазволіць расейскім войскам у доўгатэрміновай перспектыве паспрабаваць ахапіць Канстанцінаўку і больш шырокі пояс крэпасцяў Украіны – шэраг умацаваных гарадоў, якія ўтвараюць касцяк абарончых пазіцыяў Украіны», – мяркуюць у ISW.


Задачай УС РФ можа быць вымусіць украінскія войскі адступіць з Пакроўску і Мірнаграду, што на ўсход ад Пакроўску, пад пагрозай акружэння, перш чым зноў засяродзіцца на Канстанцінаўцы.

Пра тое, што «ключавыя падзеі адбываюцца на ўсход ад Пакроўску», кажа ў сваім відэа і вайсковы аналітык Ян Мацвееў. Паводле яго, шмат залежыць ад таго, ці здолеюць расейскія войскі захапіць сяло Новаэканамічнэ.

,,

«Я думаю, менавіта цяпер, найбліжэйшымі днямі, вырашыцца лёс Пакроўску. Або ўкраінскія вайскоўцы адціснуць расейскую пяхоту і ўтрымаюць ключавыя рубяжы, або пачнецца незваротны захоп гораду. Нават у гэтым выпадку гладкім і хуткім ён не будзе. Верагодней за ўсё, Пакроўск не падзе нават да канца 2025 года. Аднак выратаваць горад, хутчэй за ўсё, ужо не атрымаецца. Трэба будзе думаць пра новыя пазіцыі на паўночны захад», – заяўляе Мацвееў.


Што датычыць новапаўлаўскага кірунку на мяжы Данецкай і Днепрапятроўскай вобласцяў, то тут, паводле яго, расейскія войскі прасоўваюцца, а ЗСУ не могуць стабілізаваць сітуацыю.

«Але і катастрофы там няма. Чаму? Ды ўсё таму ж, што няма хуткіх і глыбокіх прарыву наперад. Абыход з флангаў, захоп выступу. У ЗСУ ёсць час, каб перабудоўваць абарону. І заўважце, нягледзячы на рэальныя пагрозы акружэння асобных падраздзяленняў, ніякіх катлоў, нават невялікіх, так і не здарылася. ЗСУ адступаюць, але больш-менш арганізавана», – адзначае аналітык.

Салдаты з роты наземных беспілотных сістэм 93-й асобнай механізаванай брыгады ЗСУ тэстуюць беспілотнікі перад адпраўкай на перадавую ў Данецкую вобласць, Украіна. 17 чэрвеня 2025 года. Фота: Jose Colon / Anadolu via Getty Images
Салдаты з роты наземных беспілотных сістэм 93-й асобнай механізаванай брыгады ЗСУ тэстуюць беспілотнікі перад адпраўкай на перадавую ў Данецкую вобласць, Украіна. 17 чэрвеня 2025 года. Фота: Jose Colon / Anadolu via Getty Images
Чытайце таксама:
Прэзідэнт ЗША Доналд Трамп прамаўляе на вячэры з прэм'ер-міністрам Ізраілю Бэньямінам Нэтаньягу ў Белым доме. 7 ліпеня 2025 года. Фота: Andrew Harnik/Getty Images

«Нам давядзецца гэта зрабіць». Прэзідэнт ЗША паабяцаў Украіне больш зброі

Расея страціла здольнасць наступаць на Сумшчыне

Што да іншых кірункаў, то ўкраінскі вайсковы аглядальнік Канстанцін Машавец адзначаў увечары 7 ліпеня, што «расейская Курская група войскаў са складу групоўкі войскаў (ГВ) «Поўнач», якая раней актыўна наступала ў памежжы Сумскай вобласці Украіны, страціла сваю здольнасць наступаць». Больш за тое, з ягоных словаў, у Кандратоўцы і Аляксееўцы расейскія войскі рызыкуюць трапіць у акружэнне. Тым не менш, заяўляў ён, «нельга сказаць, што перадавыя падраздзяленні праціўніка ўжо цалкам страцілі здольнасць атакаваць».

У Купянскім раёне на Харкаўшчыне, пісаў Машавец, дзе расейскія войскі змаглі стварыць плацдарм у раёне сяла Мелавое, РФ спрабуе пашырыць яго ў напрамку пасёлка Вялікі Бурлук.

,,

«Найбольш трывожным фактарам, несумненна, ёсць крызіс абароны ЗСУ на Купянскім кірунку. На дадзены момант камандаванне праціўніка спрабуе, як гаварыцца «на поўную катушку» скарыстацца сваім поспехам на плацдарме на поўнач ад гораду – стварыць перадумовы для паспяховага прарыву ў Купянск уздоўж абодвух берагоў Асколу з поўначы і адначасова нанесці паражэнне групоўцы ЗСУ, якая абараняецца ад Сяверскага Данца да мяжы ва ўсходняй частцы Харкаўскай вобласці», – мяркуе ён.


Ваенны аналітык Юрый Фёдараў таксама чакае расейскага наступу ў Запарожскай вобласці, дзе, паводле яго, сканцэнтраваная вельмі буйная групоўка войскаў РФ колькасцю больш як 100 тысячаў чалавек.

,,

«Мабыць, гаворка ідзе пра рух у бок Запарожжа», – сказаў ён у эфіры «The Breakfast Show».


Таксама Фёдараў не выключыў спробаў расейскіх войскаў заняць на гэтым кірунку Арэхаў і Гуляй-Поле, але «ўсе гэтыя планы могуць быць сарваныя Збройнымі сіламі Украіны».
,,

«Летні наступ Расеі ў самым разгары, а тэмпы захопу тэрыторыяў вышэйшыя, чым год таму. Хай не ўсе гэтыя квадратныя кіламетры маюць вырашальнае значэнне, але тым не менш. Падобна на тое, што Пуцін сапраўды паставіў перад сваімі войскамі задачу канчаткова зламаць ЗСУ да канца года. Адсюль і магутны націск», – заключыў Мацвееў.


Авіякалапс і атакі на ТЦК

Вядома, адной лініяй фронту сутыкненні не абмяжоўваюцца. Гэтак, 7 ліпеня ўкраінскія беспілотнікі атакавалі хімічны завод у Падмаскоўі і НПЗ у Краснадарскім краі РФ. Церпіць ад украінскіх атак і расейская транспартная галіна. Гэтак, з 5 ліпеня па 06:00 7 ліпеня расейскія авіякампаніі скасавалі 485 рэйсаў, на запасныя аэрадромы сышлі 88 рэйсаў, было затрымана на вылет і прылёт 1,9 тыс. рэйсаў, аформлена 43 тыс. вымушаных зваротаў квіткоў. Усё гэта прыводзіць да вялікіх выдаткаў расейскай авіягаліны: паводле ацэнак «Коммерсанта», авіякалапс каштаваў расейскім авіякампаніям каля 20 млрд расейскіх рублёў, або 250 млн долараў.

Пажарныя сядзяць перад целам загінулага на фоне абваленага пад'езду шматпавярховіка пасля расейскага ўдару ў Краматорску, Украіна. 22 чэрвеня 2025 года. Фота: Tetiana Dzhafarova / AFP / East News
Пажарныя сядзяць перад целам загінулага на фоне абваленага пад'езду шматпавярховіка пасля расейскага ўдару ў Краматорску, Украіна. 22 чэрвеня 2025 года. Фота: Tetiana Dzhafarova / AFP / East News

Расея ж актыўна атакуе ўкраінскія ТЦК – аналагі беларускіх ваенкаматаў. Паводле «Mash», УС РФ вывелі з ладу больш як 10% ТЦК па ўсёй Украіне (у Крэменчугу, Запарожжы, Кіеве, Харкаве, Вінніцы), або каля 30 з 300 будынкаў, якія выкарыстоўваюць цэнтры камплектавання ЗСУ. На думку аналітыка Фёдарава, тым самым Расея спрабуе сарваць украінскую мабілізацыю, бо праз атакі яе тэмпы «могуць сур’ёзна скараціцца».

Макар Мыш belsat.eu

больш па гэтай тэме

Глядзіце больш
Item 1 of 4

апошнія

Item 1 of 10