Надоечы ў Пастаўскім раёне Віцебскай вобласці пачаўся «праверачны збор з прызывам ваеннаабавязаных», і падчас гэтых вучэнняў там сякуць дрэвы ды ўсталёўваюць супрацьтанкавыя загароды. Вайсковы эксперт растлумачыў «Белсату», навошта гэта робіцца.
З Пастаўшчыны робяць умацаваны раён. Відавочцы расказалі «Белсату», што ўздоўж дарог сякуць дрэвы ды іншую расліннасць, што перашкаджае агляду. «Трасы цяпер праглядаюцца цалкам», – сцвярджаюць нашыя суразмоўцы. «Зачышчаюць» у тым ліку дарогу Р45, што злучае Полацк з Катлоўкаю на мяжы з Літвой і далей ідзе на Вільню.
Акрамя таго, вайскоўцы «ўсталёўваюць зубы цмока і нешта рыюць», кажуць відавочцы.
Цяпер у Пастаўскім раёне трывае «праверачны збор з прызывам ваеннаабавязаных і з пастаўкаю транспартавых сродкаў тэрытарыяльных войскаў». Паводле Міністэрства абароны, ён працягнецца да 15 красавіка.
Гэтае правяранне мае вызначыць, наколькі мясцовы выканкам і ваенкамат гатовыя да фармавання тэрытарыяльных войскаў. Заняткі з рэзервістамі ладзяцца на палігонах і «ўчастках мясцовасці Пастаўскага раёну».
Вайсковы эксперт, які паразмаўляў з «Белсатам» на ўмовах ананімнасці, кажа, што, з аднаго боку, збор насамрэч планавы, а з другога – вучэнні зладзілі ў нетыповы час:
«Зазвычай такія вучэнні праводзяцца ўзімку, калі сельскагаспадарчыя ўгоддзі пад снегам і для манеўру ў вайскоўцаў ёсць больш магчымасцяў, калі не загружаныя сельгастэхнікай мясцовыя дарогі. І гэта звычайна праводзіцца максімум да лютага. Але цяпер мы бачым, што зборы гэтыя праводзяцца ўжо ў сакавіку – красавіку».
Аналітык мяркуе, што гэта адказ цяперашняга вайскова-палітычнага кіраўніцтва Беларусі на актыўнасць вайскоўцаў у суседніх краінах. У Еўропе не выключаюць, што пасля завяршэння вайны ва Украіне Расея нападзе на ЕЗ, і таму рыхтуецца:
«Гэтыя краіны прыкладаюць намаганні, каб павялічыць вайсковы патэнцыял, таксама ствараюць абарончыя ўмацаванні, мінуюць мяжу, ствараюць лініі загародаў, мяняюць спосаб камплектавання свайго войска, купляюць узбраенне і гэтак далей. Заўсёды такія рэчы насцярожваюць суседні бок і ўраўнаважваюцца дзеяннямі суседняга боку. Я думаю, што пасля актыўнасці беларускага боку будзе актыўнасць літоўскага, польскага ды іншых бакоў».
У Менску, як кажа эксперт, палічылі правакацыйнаю актыўнасць вайскоўцаў у суседзяў: маўляў, мы – краіна мірная, і таму трэба паказаць, што мы рыхтуемся да абароны.
У Пастаўскім раёне ствараюцца фартыфікацыйныя збудаванні, якія, паводле планаў уладаў, маюць з'явіцца ўздоўж беларускай мяжы з краінамі NATO.
«Пастанавілі стварыць умацаваныя раёны там, дзе мясцовасць дазваляе наступаць механізаваным і танкавым злучэнням. Беларусь агулам цяжкадаступная для вонкавага ворага, багата лясоў і балотаў, аднак маюцца ўчасткі, што дазваляюць уварвацца на нашую тэрыторыю», – тлумачыць суразмоўца «Белсату».
Такія фартыфікацыйныя збудаванні робяцца, так бы мовіць, пра запас: вайскоўцы не будуць дзяжурыць там стала, а разам з рэзервістамі зоймуць пазіцыі пры пагрозе нападу.
Бетонныя піраміды, гэтак званыя зубы цмока – часткі такіх умацаванняў:
,,«Яны мусяць перашкаджаць руху танкаў і бранятанкавай тэхнікі. Акрамя таго, расчышчаецца сектар абстрэлу. Калі дзесьці будуюцца доўгачасовыя абарончыя збудаванні – доты, дзоты, артылерыйскія пазіцыі, – то перад імі расчышчаецца сектар абстрэлу, каб патэнцыйны супернік не мог тамака назапасіцца перад наступам».
Такім чынам, дрэвы ўздоўж дарог сякуць, каб бачыць праціўніка.
Усё, што цяпер адбываецца на заходніх межах Беларусі, вайсковы эксперт называе эскалацыяй. Расея напала на Украіну, у тым ліку з тэрыторыі нашай краіны, дзяржавы ЕЗ кінуліся ўмацоўваць мяжу, заварушылася NATO, улады Беларусі бачаць у гэтым пагрозу і пачынаюць рабіць захады, на гэтыя захады адказвае Захад – замкнёнае кола. І надзвычай небяспечнае, разважае суразмоўца «Белсату»:
,,«Патэнцыйна праз якое-кольвек няслушнае дзеянне можа ўзнікнуць узброены канфлікт або нават вайна. Найслабейшы элемент тут – людзі. У людзей ёсць нервы, гэта напружанне, калі ты стала ў баявой гатовасці са зброяй у руках. Чалавек не жалезны, ён не вытрымлівае, і можа пачацца страляніна. Усё патэнцыйна небяспечна».
Развязваць праблему мусяць палітыкі і дыпламаты, каб «вайскоўцы спыніліся, не даводзілі справы да чырвонай мяжы», патрэбная «разрадка напружанасці», кажа аналітык. Пакуль жа – новая халодная вайна.
«Цяпер пэўны варыянт халоднай вайны, што можа перарасці ў гарачую, і ўсё праз недавер. Бакі не давяраюць адно аднаму. Зрэшты, маюцца і палітычныя мэты: калі насельніцтва мабілізаванае, ім лягчэй кіраваць, лягчэй растлумачыць эканамічныя нягоды, маўляў, трэба трываць, бо вораг на парозе», – падсумаваў вайсковы эксперт.
Надзея Вольная, Сцяпан Кубік belsat.eu
