Грузія вырашыла спрасціць атрыманне віду на жыхарства ў сваёй краіне прадстаўнікам сферы ІТ, з восені яго можна будзе атрымаць адразу на 3 гады. Ці будзе прывабным такі варыянт для многіх беларусаў, якія зараз знаходзяцца ў гэтай краіне і плануюць у ёй сваё далейшае жыццё? Сабралі меркаванні.
Адразу на 3 гады
12 чэрвеня грузінскі парламент ухваліў змены ў заканадаўстве, што адкрываюць новыя магчымасці для замежных ІТ-спецыялістаў. Папраўкі да закона «Аб прававым статусе замежнікаў і асоб без грамадзянства» дазваляюць атрымаць від на жыхарства тым, хто працуе ў сферы інфармацыйных тэхналогій – як у якасці спецыяліста ці індывідуальнага прадпрымальніка, так і ў ролі кіраўніка міжнароднай ІТ-кампаніі.
Таксама права на жыхарства атрымаюць члены іх сем’яў.
Каб атрымаць ВНЖ, трэба будзе прадставіць дакументы, што пацвярджаюць мінімум два гады досведу ў ІТ-сферы і гадавы даход не менш за 25 тысяч долараў.
Новы від на жыхарства будзе выдавацца на тры гады з магчымасцю падаўжэння да 12 агулам. Але калі замежнік будзе адсутнічаць у Грузіі больш за 183 дні на працягу года, дазвол анулююць. Выключэнне прадугледжана для тых, хто выехаў на лячэнне.
Папраўкі пачнуць дзейнічаць з 1 верасня 2025 года. Да гэтага часу ўраду трэба яшчэ сфармуляваць спіс ІТ-прафесій і вызначыць дакладныя правілы падачы дакументаў. Згодна з законам, заявы, пададзеныя да верасня 2026 года, павінны разглядацца на працягу тэрміну, які не перавышае 90 дзён.
Што кажуць самі беларусы
У тэматычных чатах, дзе ёсць прадстаўнікі Беларусі, жыва абмяркоўваюць гэтыя змены. Некаторыя беларусы кажуць, што будуць чакаць гэтую магчымасць, каб легалізавацца ў краіне. У той жа час ёсць і скептычныя меркаванні з нагоды гэтага закону.
Адзін з карыстальнікаў дзівіцца, што ў гэтага закону фактычна з прывабных бакоў – толькі больш доўгі тэрмін ВНЖ: адразу на тры гады. Нагадаем, што паводле цяперашніх законаў, ВНЖ выдаецца ад 6 да 12 месяцаў.
Другі карыстальнік адзначае, што, на ягоны погляд, паводле новага закону, будзе «пагаршэнне ўмоваў», бо зараз дастаткова для атрымання ВНЖ «паказаць» абарот у 50 тысячаў лары (больш за 18 тысячаў долараў). Згодна з новым законам, гадавы даход павінны быць не меншы за 25 тысячаў долараў.
Што да атрымання ВНЖ на членаў ся'мі, іншы карыстальнік таксама выказвае меркаванне, што зараз з гэтым няма вялікай праблемы:
,,«На сённяшні дзень ВНЖ робіце на сябе як асноўны заяўнік (падстава – ІП з абаротам 50 тысячаў лары), атрымліваеце картку і на наступны дзень можна падаваць жонку, для яе пакет дакументаў зусім просты», – піша карыстальнік.
Крытычна ацэньваюць гэты законапраект і беларусы, якія не так даўно змянілі месца жыхарства з Грузіі на краіны Еўразвязу.
,,«Гэта не самы прывабны варыянт. У суме агулам там ВНЖ толькі на 12 гадоў? А што далей? Грамадзянства не атрымаеш. Навошта тады? Ну, калі толькі хочацца проста пажыць у Грузіі для разнастайнасці», – сазнаецца суразмоўца «Белсату».
Такой магчымасцю, падкрэслівае суразмоўца, на жаль, не змогуць скарыстацца беларусы, якія зазналі пераслед беларускіх уладаў. Акрамя таго, ёсць яшчэ адзін аспект, які нельга скідваць з рахункаў: выязджаючы з Грузіі на візаран (абнуленне візы), не заўсёды можна вярнуцца назад у краіну.
,,«Для "палітычных" і тых, хто не можа мяняць пашпарт у Беларусі, адразу міма. І яшчэ заўсёды вісіць рызыка, што цябе не ўпусцяць у краіну, бо ВНЖ, як паказвае практыка, не гарантыя», – кажа суразмоўца.
Сапраўды, ужо было некалькі выпадкаў, калі беларусаў, якія пасля кароткачасовага выезду з краіны для абнулення легальнага тэрміну знаходжання (візарану), сутыкаліся з тым, што іх не пускаюць назад у Грузію. Такі выпадак адбыўся 8 траўня з беларускі актывістам Змітром Грынкевічам. Здараліся такія выпадкі і раней, яшчэ ў 2022 і 2023 гадах.
На думку праваабаронцы Рамана Кісляка, візаран – «гэта заўсёды латарэя», бо грузінскія ўлады могуць не ўпусціць пасля выезду назад. А абскарджанне потым займае гады.
Адзін з удзельнікаў чата ў Грузіі, таксама выказаў меркаванне, што ўвядзенне новага закона можа адбывацца на фоне жадання грузінскіх уладаў зрабіць больш жорсткім бязвізавы рэжым для прыезджых: «То-бок увядуць гэты ВНЖ, а таму скароцяць бязвіз да паўгода ці яшчэ менш».
Насамрэч грузінскія ўлады пакуль такіх намераў не выказвалі, прынамсі для турыстаў з Беларусі. У той жа час з 16 траўня быў прыняты закон, які ўводзіць больш жорсткія правілы бязвізавага ўезду для грамадзянаў 17 краін з высокай рызыкай міграцыі. Беларусі сярод іх няма. Пакуль.
Раман Шавель belsat.eu
