У пункце пропуску «Беняконі» на беларуска-літоўскай мяжы да 20 чэрвеня праходзіць рамонт дарог. Праз гэта рух праз пункт пропуску можа быць ускладнены, папярэджвае Дзяржаўны мытны камітэт Беларусі.
«Просім улічваць азначанае пры планаванні перасячэння беларуска-літоўскай мяжы», – адзначае Дзяржаўны мытны камітэт Беларусі.
«Беняконі» – адзін з двух пунктаў пропуску на беларуска-літоўскай мяжы. Вялікія аўтамабільныя і аўтобусныя чэргі тут цяпер бываюць рэдка праз абмежаванні Літвы. Калі аўтамабіль з беларускімі нумарамі, то ўехаць у Літву можна толькі ў выпадках, калі аўто належыць грамадзяніну Беларусі з літоўскай візай або ВНЖ ці калі ўладальнік машыны – грамадзянін адной з краін ЕЗ. У абодвух выпадках паездка павінна быць для асабістых мэтаў.
Таксама абмежаваная колькасць пасажырскіх аўтобусаў, якія едуць з Беларусі ў Літву.
Тым часам на «Беняконях» звычайна вельмі вялікія чэргі з грузавога транспарту. Напрыклад, 16 чэрвеня ўезду ў Літву чакаюць каля 500 грузавых аўтамабіляў. Дзяржпамежкамітэт Беларусі рэгулярна скардзіцца, што літоўскія калегі працуюць вельмі марудна.
На ровары або пешшу прайсці «Беняконі» нельга.
Арсен Рудэнка belsat.eu
