На Дзень смеху «Белсат» сабраў шмат смешных беларусаў, якіх можна паглядзець ці пачытаць у сацсетках. Гумар на розны густ: ад злобна-палітычнага да рэтра-іранічнага.
Бадай, самы пазнавальны беларускі прафесійны жартаўнік у 2025 годзе – стэндап-комік Слава Камісаранка. Яго можна пабачыць не толькі на Youtube, дзе ягоны канал мае паўтара мільёна падпісантаў, але і на стэндзе «Іх шукае міліцыя», і ў «спісе тэрарыстаў». Гэта не жарты: вы смяяліся з Чык-чырыка, а беларуская дзяржава пакрыўдзілася. Ці аж сам Чык-чырык схадзіў на канцэрт пад прыкрыццем?
Камісаранка жартуе не толькі і не столькі пра Аляксандра Лукашэнку (якога мы не лічым комікам, нягледзячы на безліч створаных ім мэмаў). Куды больш пра самога сябе, свае стасункі з дзяўчынамі, з нядаўняга часу яшчэ і пра прыгоды ў эміграцыі. Часты жанр на ягоным канале – размовы з аўдыторыяй пасля выступу, якія весяляць не менш за сам выступ. Бывае, аўдыторыя сама жартуе з коміка.
Хто можа насмяшыць Камісаранку
«Белсат» спытаў Славу Камісаранку, каго б ён сам параіў з беларускіх гумарыстаў.
Першая рэкамендацыя – дасведчаны стэндап-комік Павел Крывец. У яго якраз нядаўна выйшаў у бясплатны доступ відэазапіс сольнага канцэрту «В светлой куртке», які Крывец сам напісаў і зрэжысераваў.
Саша Калінкін – яшчэ адзін стэндап-комік, якога Камісаранка вельмі рэкамендуе. Калінкін нярэдка выступае па-беларуску і адкрыта расказвае пра сваю хваробу, спінальную мышачную атрафію.
Камісаранка нагадвае, што беларусы ў Варшаве нядаўна адкрылі клуб «Stand Up Lokal». Ён і сам падтрымаў клуб фінансава. Комікі даюць там канцэрты амаль штодня, квіткі можна купіць тут.
Там выступаюць і згаданыя Павел Крывец і Саша Калінкін, і мноства іншых беларускіх комікаў: Ідрак Мірзалізадэ, Міхась Ільін, Макс Канавал, Іра Прыходзька… Мірзалізадэ і Ільін выпускаюць на канале «Lokal» шоў «Гутаркі», на якое Камісаранка асобна звяртае ўвагу. Пра Прыходзьку ж Камісаранка згадвае: у яе нядаўна якраз выйшаў канцэрт, зняты ў Варшаве.
Паша Залуцкі – яшчэ адзін беларускі комік, на свежы канцэрт якога раіць паглядзець Камісаранка. Залуцкі – першы адкрыты гомасексуал у беларускім стэндапе.
А мы і самі жартаваць умеем (спадзяемся)
Калі што, тут і ніжэй не Камісаранка рэкамендуе, гэта мы самі раім, усе прэтэнзіі да нас! На «Белсаце» рэгулярна выходзіць гумарыстычнае шоў «Хай Так ТВ». Яго ў гэтым сезоне вядуць вядомыя купалаўцы і чын-чыны Міхаіл Зуй і Дзмітры Есяневіч. А адзін з колішніх вядоўцаў «Хай Так ТВ» Дзяніс Дудзінскі разам з жонкай Кацярынай Раецкай нядаўна правёў прэм’ерныя выпускі шоў «Раніца з Белсатам» – здаецца, таксама выйшла нясумна.
На «Белсаце» таксама выходзіць «Жэстачайшы мульт» – мультфільмы для тых, хто гатовы смяяцца з зусім нясмешнай беларускай рэальнасці.
На «Вот Так» – расейскамоўным праекце «Белсату» – выходзіць шоў «Вечерний шпиль» Алеся Карніенкі. Ён расказвае пра сур’ёзныя рэчы і стрымлівае сарказм, як толькі можа, але спраўляецца не заўсёды.
І гэта далёка не ўсё, з чаго можна пасмяяцца на «Белсаце». Вас могуць насмяшыць размовы з чыноўнікамі ў «Шухер-шоў» аўтара «Рудабельскай паказухі» Андрэя Павука. А могуць па-добраму павесяліць коцікі ў гістарычнай перадачы Цімоха Акудовіча «Вусы Скарыны».
І не толькі мы! Вось яшчэ шмат смешных беларусаў
Калі вам раптам мала коцікаў і гісторыі Беларусі ад Цімоха Акудовіча, то нясумнае гістарычнае шоў «Хрусь і папалам» вядуць Валер Руселік і ўжо згаданы Сяргей Зуй. А калі наш «Жэстачайшы мульт» недастаткова жэстачайшы, ёсць яшчэ больш жорсткі і «экстрэмісцкі» вэб-мультсерыял «Жопа с усами».
Калі ж хочаце паглядзець больш стэндапераў, звярніце ўвагу на беларускамоўны праект «Pan Standup» (які пазіцыянуе сябе як «Ахову камедыі бацькаўшчыны») і на расейскамоўны «BYLOL» (не блытаць з «BYSOL» і «BYPOL»).
Можаце пасмяяцца і з іншых беларускіх комікаў. Напрыклад, свае выступы і жарты публікуюць у сеціве Ваня Усовіч, Дзмітрый Нарышкін, Жэня Буракевіч, Даша Герман і іншыя. Можаце смяяцца і не з комікаў: вось Ліза Ветрава – нібы не гумарыстка, але нават калі размаўляе на сур’ёзныя тэмы, умее выклікаць усмешку.
Сапраўды, не абавязкова быць гумарыстам, каб выходзіла смешна. Вось салідныя дзядзі і цёці робяць сур’ёзныя фоты – і трапляюць у стужку «No Context Belarus».
І гумар можна не толькі глядзець, але і чытаць. Згаданы Міхась Ільін камусьці можа быць больш вядомы не як стэндапер, а як той «Ілля з твітару». Там жа, на былым Twitter і цяперашнім X, праславіўся Джыпсінкоў, туды ж піша Грустный Коленька.
А яшчэ гумар можна слухаць у песнях. У беларускіх музыкаў усё добра з гумарам: ад вясёлых «Трох чарапах» Лявона Вольскага да іранічнай трасянкі гурта «Разбітае сэрца пацана». У музыку падаўся нават адзін вядомы беларускі стэндапер: Дзмітрый Саўяненка цяпер Pan Savyan, спявае па-польску рэтра-іранічныя «Песні для цябе і тваёй мамусі».
Алесь Наваборскі belsat.eu
