Беларусь і Расея надумалі знізіць параметры прызначаных на восень двухбаковых вучэнняў «Захад-2025». Таксама іх перанясуць углыб тэрыторыі, заявілі ў Міністэрстве абароны Беларусі. Тым часам Польшча збіраецца правесці ў адказ свае буйныя вучэнні.
«Мы пастанавілі знізіць параметраў вучэнняў «Захад-2025» і перанесці іх асноўныя манеўры ўглыб тэрыторыі Рэспублікі Беларусь ад заходніх межаў», – сказаў міністр абароны Віктар Хрэнін.
Паводле яго, гэтыя вучэнні не нацэленыя супраць каго-небудзь, а перанос асноўных манеўраў углыб Беларусі сведчыць пра гатовасць да дыялогу і зніжэння напружанасці ў рэгіёне.
,,«Робім гэта, шчыра кажучы, не спадзеючыся на канструктыўную рэакцыю ў адказ. Робім у большай ступені для дэманстрацыі нашым саюзнікам і партнёрам па ўсім свеце праўдзіва міралюбнай пазіцыі Рэспублікі Беларусь», – сказаў Хрэнін, пры якім беларускія войскі спрыялі ўварванню расейскіх ва Украіну.
Літва: Расея і Беларусь не могуць дазволіць сабе вялікіх маштабаў
У сваю чаргу начальнік штабу абароны Збройных сілаў Літвы Рэмігіюс Балтрэнас заявіў, што расейска-беларускія вучэнні сёлета не будуць «больш маштабнымі і небяспечнымі», як чатыры гады таму.
«Ніхто не можа адмаўляць дрэнных і злых намераў Расеі і Беларусі, яны застаюцца, і мы бачым, што адбываецца, але «Захад» сёлета не будуць маштабнейшымі і больш пагрозлівымі, як у 2021 годзе», – заявіў Балтрэнас 27 траўня, перадае «Delfi».
Паводле яго, праз вайну ва Украіне «Расея і Беларусь не могуць дазволіць сабе вялікіх маштабаў, бо гэта проста фізічна немагчыма».
,,«Выведка NATO і Выведка Літвы выконваюць свае функцыі, сістэмы апавяшчэння працуюць, ніякіх сюрпрызаў на гэты момант мы не прадбачым», – сказаў ён.
26 траўня віцэ-прэм'ер і міністр нацыянальнай абароны Владыслаў Касіняк-Камыш заявіў, што ў адказ на «Захад-2025» польскія жаўнеры возьмуць удзел у найбуйнейшых за апошнія гады вучэннях. У манеўрах будзе задзеяная 18-ая механізаваная дывізія, піша «Polsat».
«У пачатку лютага на брыфінгу з кіроўным складам Войска Польскага, на якім прысутнічаў, сярод іншых, прэзідэнт Польшчы, я загадаў правесці першае за апошнія гады буйное дывізіённае вучэнне. 18-ая механізаваная дывізія правядзе такія вучэнні (...) і будзе цалкам гатовая паказаць нашыя магчымасці і навыкі, таксама з нашымі саюзнікамі», – сказаў Касіняк-Камыш.
Вучэнні пад кодаваю назваю «Жалезны абаронца» былі анансаваныя апошнімі месяцамі кіраўніцтвам Міністэрства нацыянальнай абароны і збройных сілаў Польшчы. Адно з заданняў вучэнняў – праверыць, наколькі ў падраздзяленні 18-й дывізіі, у якую ўваходзяць бальшыня вайсковых частак, дыслакаваных на ўсход ад Варшавы, ужо ўдалося ўкараніць сістэматычныя пастаўкі сучаснай тэхнікі, напрыклад, танкаў «M1 Abrams».
Вучэнні «Захад» праводзяцца кожныя два гады і сёлета запланаваныя на верасень. Афіцыйныя мэты – адпрацаваць супольныя абарончыя і наступальныя дзеянні, палепшыць узаемадзеянне паміж збройнымі сіламі і праверыць гатовасць вайскоўцаў да розных сцэнароў у плане бяспекі. Падобныя вучэнні заўсёды выклікаюць занепакоенасць у суседніх краінах. Не выключаецца магчымасць таго, што яны стануць падставаю для агрэсіі.
У 2023 годзе вучэнні не праводзіліся. Імавернаю прычынай адмены вучэнняў брытанская выведка назвала нястачу ў расейскай арміі жывой сілы і тэхнікі, а таксама нежаданне расейскага кіраўніцтва паддавацца крытыцы за рэгулярныя паказальныя манеўры падчас вайны ва Украіне.
Якуб Хруст belsat.eu
