У Калінкавіцкім раёне выпусцілі на волю каля ста ланяў, якіх раней утрымлівалі на спецыяльнай ферме. Паводле спецыялістаў, бальшыня здолее прыстасавацца да жыцця ў дзікай прыродзе.
У лясах лані сутыкаюцца з прыроднымі ворагамі, як ваўкі і рысі. Гэтыя драпежнікі могуць уплываць на колькасць папуляцыі ланяў, што і здарылася ў Беларусі. Таму і спатрэбілася адмысловая ферма для павелічэння папуляцыі.
Тры гады таму на такую ферму ў Калінкавіцкім раёне завезлі каля 60 ланяў. За час перабывання на ферме жывёлінам стварылі добрыя ўмовы: якасны медычны нагляд і збалансаванае харчаванне. Гэта спрыяла ўмацаванню іхнага здароўя і павелічэнню шанцаў на паспяховую адаптацыю ў натуральным асяроддзі. За тры гады папуляцыя ланяў значна павялічылася. Частку ўжо перадалі ў Гарадзенскую і Віцебскую вобласці. Прыйшоў час выпусціць ланяў і ў лясы Калінкавіцкага раёну. Паводле спецыялістаў, каля 90 % жывёлінаў здолеюць прыстасавацца да жыцця ў дзікай прыродзе.
Нагадаем, што дзякуючы дзяржаўнай абарончай праграме ў Беларусі рэкордных памераў дасягнула папуляцыя зуброў. На сакавік 2020 года колькасць лясных волатаў перавысіла 2000 асобінаў і набліжаецца да паловы ўсёй сусветнай папуляцыі (каля 4500 асобінаў). З аднаго боку, рост папуляцыі зуброў сведчыць пра паспяховасць ахоўных захадаў. З другога – узнікаюць праблемы ўзаемадзеяння зуброў з чалавекам і сельскай гаспадаркай. Яны топчуць палі, прыходзяць на прыватныя падворкі, нават прыбіваюцца да статкаў кароў. Таму ўсё часцей гучаць заклікі кантраляваць іхную колькасць.
Надзея Вольная belsat.eu
