У Страсбуры 11 сакавіка адбылася адмысловая пленарная сесія Еўрапарламенту, прысвечаная Міжнароднаму дню жанчын. Перад прыблізна 700 парламентарыямі выступілі Святлана Ціханоўская і былая палітзняволеная Паліна Шарэнда-Панасюк.
Паліна Шарэнда-Панасюк сказала ў сваёй прамове, што яна чатыры гады была закладніцаю рэжыму Лукашэнкі і «прайшла праз пекла турмаў дыктатара, які ў нязменным выглядзе захаваў метады фізічнага і псіхічнага вынішчэння сталінскага ГУЛАГу».
,,«Чатыры гады поўнай ізаляцыі ад свету, ад дзяцей і родных. Чатыры гады адзіночных камераў, перасыльных вагонаў, 270 дзён ШІЗА – месцаў ізаляцыі і катаванняў. Але я вытрымала і выйшла на свабоду».
Былая палітзняволеная падкрэсліла, што цяпер на волі ў тым ліку дзякуючы прынцыповай пазіцыі дэпутатаў Еўрапарламенту. Яна асобна падзякавала прэзідэнтцы Еўрапарламенту Рабэрце Мэтсаля за ўсе захады, зробленыя дзеля яе, Паліны, вызвалення.
Актывістка нагадала, што, аднак, за кратамі ўсё яшчэ застаюцца тысячы іншых палітвязняў, сярод якіх – ейныя паплечнікі з «Еўрапейскай Беларусі»: Яўген Афнагель, Максім Вінярскі, Андрэй Войніч, Павел Юхневіч.
«Шмат пра каго з палітвязняў няма звестак ужо больш за два гады, як пра аднаго з лідараў беларускай нацыі Міколу Статкевіча. Невядома, ці ўвогуле жывы ён. Катастрафічнае становішча ў жанчын-палітзняволеных: Вікторыі Кульшы, Алены Гнаук, Вольгі Маёравай. Я вельмі трывожуся за іхнае жыццё», – казала Паліна Шарэнда-Панасюк.
Былая палітзняволеная заклікала не верыць беларускім уладам, што палітвязні нібыта выпускаюцца праз гуманізм.
,,«Не. З людзей катаваннямі выбіваюць прашэнні да Лукашэнкі аб памілаванні, прымушаюць даваць "пакаяльныя" інтэрв’ю і падпісваць паперы пра супрацу з КДБ. Людзей калечаць, шантажуюць, пагражаюць ціскам на сваякоў, забіраюць дзяцей і маёмасць. Сотні тысячаў беларусаў пад пагрозаю новых рэпрэсіяў былі вымушаныя ўцякаць з краіны», – казала жанчына.
Паліна Шарэнда-Панасюк заклікала Еўрапарламент да ўзмацнення рэальнага ціску на рэжым, не толькі праз увядзенне новых санкцыяў і дасканалага кантролю над іх ажыццяўленнем:
«Супраць рэжыму Лукашэнкі мусяць быць уведзеныя поўная блакада і гандлёвае эмбарга. Праз канцлагер пад назваю Беларусь не павінна быць аніякага транзіту тавараў, што ідуць у Еўропу з Кітаю і іншых краінаў Усходу. Рэжым павінен зрабіцца поўным ізгоем у палітычным, эканамічным і спартовым плане. <….> Без вольнай Беларусі існаванне свабоды і дэмакратыі ў Еўропе заўжды будзе пад пагрозаю, у тым ліку расейскай агрэсіі. Таксама перамога ва Украіне не будзе магчымай і поўнай без свабоднай Беларусі. <…> Мы змагаемся за тыя каштоўнасці, на якіх заснаваны Еўразвяз. У гэтай барацьбе нам патрэбная вашая дапамога».
Паліну Шарэнду-Панасюк затрымалі 3 студзеня 2021 года. Пра ейнае вызваленне з-за кратаў пасля чатырох тэрмінаў сталася вядома 1 лютага. Яе пратрымалі ў няволі 4 гады і 1 месяц.
За час несправядлівага зняволення ў Паліны сур’ёзна пагоршыўся стан здароўя, з’явіўся хранічны панкрэатыт. Жанчыну пазбавілі магчымасці камунікаваць з няпоўнагадовымі сынамі – Славамірам і Стахам.
Паліну пакаралі спачатку двума гадамі пазбаўлення волі нібыта за гвалт у дачыненні працаўніка органаў унутраных справаў (арт. 364 КК), знявагу прадстаўніка ўлады (арт. 369 КК), знявагу прэзідэнта Рэспублікі Беларусь (арт. 368 КК). Пасля жанчыну яшчэ некалькі разоў каралі нібыта за зацятае непадпарадкаванне адміністрацыі папраўчай установы (арт. 411 КК).
6 лютага Паліна з'ехала ў Вільню.
Марыя Міхалевіч belsat.eu
