Паліна Шарэнда-Панасюк прыехала ў Вільню, пасля таго як з’ехала з Беларусі. Трансляцыю кароткай сустрэчы з журналістамі напярэдадні прэс-канферэнцыі вёў Барыс Гарэцкі. Яна апавяла, як пачуваецца, і пракаментавала інтэрв'ю ў дзяржаўным СМІ.
Паліна Шарэнда-Панасюк падзякавала за падтрымку і нагадала пра пакуты палітвязняў, якія застаюцца за кратамі ў Беларусі. Палітзняволеная Вікторыя Кульша, па словах Паліны, знаходзіцца ў крытычным стане.
Яна распавяла, што ў 2023 годзе была на вуліцы толькі 8 дзён, а увесь астатні час прабыла ў ШЫЗА і ПКТ.
Таксама яна пракаментавала інтэрв'ю, якое з’явілася з ёю на беларускім тэлебачанні.
«Вы мусіце разумець, што гэтае інтэрв'ю зробленая з нажом каля горла, з пісталетам каля патыліцы. Усё гэта мерзка і страшна, але жыць пад уладаю забойцы, псіхапата 30 гадоў запар – гэта яшчэ больш мерзка і страшна», – сказала Паліна.
Цяпер жанчына ў вельмі ўзнёслым стане. Усю ж дарогу з Беларусі яна была «як спружына», але адзначыла, што засталася такой жа, як раней.
«Гэта як уваскрашэнне з мёртвых, я проста думала ў пэўны момант, што я ўжо ніколі не выйду», – дадала яна.
Былая палітзняволеная цяпер проста хоча абняць дзяцей.
Лідарка дэмсіл Беларусі Святлана Ціханоўская ў сваім відэазвароце прывітала Паліну Шарэнда-Панасюк на волі.
«Дарагая наша, Паліна! Я так радая бачыць вас на волі і ў бяспецы. Ведаеце, калі я пачула пра вашае першае слова ў Вільні, калі вы выйшлі з цягніка, то вельмі расчулілася. Бо гэтае “Жыве Беларусь!” – натхненне для нас усіх і напамін, што свабода пачынаецца з людзей. Такіх жа цудоўных і нязломных беларусаў, як вы. Я спадзяюся, мы хутка з вамі пабачымся», – сказала Святлана Ціханоўская.
Паліну Шарэнду-Панасюк затрымалі 3 студзеня 2021 года. Пра ейнае вызваленне з-за кратаў пасля чатырох тэрмінаў стала вядома 1 лютага. Яе пратрымалі ў няволі 4 гады і 1 месяц.
За час несправядлівага ўтрымлівання за кратамі ў Паліны сур’ёзна пагоршыўся стан здароўя, з’явіўся хранічны панкрэатыт.
Падчас зняволення жанчыну пазбавілі магчымасці камунікаваць з няпоўнагадовымі сынамі – Славамірам і Стахам. Увогуле звестак пра Паліну Шарэнду-Панасюк было крытычна мала.
Паліну пакаралі спачатку двума гадамі пазбаўлення волі нібыта за гвалт у дачыненні працаўніка органаў унутраных справаў (арт. 364 КК ), знявагу прадстаўніка ўлады (арт. 369 КК), знявагу прэзідэнта Рэспублікі Беларусь (арт. 368 КК).
Пасля Паліну яшчэ некалькі разоў каралі нібыта за зацятае непадпарадкаванне адміністрацыі папраўчай установы (арт. 411 КК).
Арсен Рудэнка belsat.eu
