Дзяржаўны сакратар ЗША Маркаў Руб’ёў паведаміў 10 сакавіка пра скасаванне 83 % праграмаў Агенцтва Злучаных Штатаў у справе міжнароднага развіцця (USAID). Рэалізацыя ўсіх праграмаў была раней прыпыненая на 90 дзён для правядзення аналізу.
«Пасля шасцітыднёвага аналізу мы афіцыйна скасоўваем 83 % праграмаў USAID. На 5200 ануляваных кантрактаў былі выдаткаваныя дзясяткі мільярдаў долараў такім чынам, што гэта не адказвала (а ў некаторых выпадках нават шкодзіла) асноўным нацыянальным інтарэсам Злучаных Штатаў», – адзначыў Маркаў Руб’ёў у сацыяльнай сетцы X.
З ягоных словаў, астатнія 18 % (такія адсоткі прыводзіць палітык) праграмаў, або каля 1000, цяпер будуць больш эфектыўна кіравацца Дзяржаўным дэпартаментам.
Дзяржсакратар таксама падзякаваў Дэпартаменту эфектыўнасці ўраду (DOGE), які ўзначальвае алігарх Ілан Маск, і працаўнікам свайго ведамства за «гэтую наспелую гістарычную рэформу».
Пасля інаўгурацыі Доналда Трампа Вашынгтон замарозіў амаль усю замежную дапамогу, у тым ліку прыпыніў – афіцыйна на тры месяцы – працу Агенцтва ЗША ў справе міжнароднага развіцця (USAID), на долю якога прыпадае 40 % сусветнай замежнай дапамогі. Яно фінансавала самыя розныя праекты: ад змагання з ВІЧ да захавання біяразнастайнасці і ўмацавання мясцовага кіравання.
У каментары «Белсату» кандыдат гістарычных навук Яўген Красулін адзначыў, што прыпыненне амерыканскай дапамогі даволі моцна адчуваецца ў краінах Глабальнага поўдня, асабліва ў краінах Афрыкі на поўдзень ад Сахары, дзе значныя грошы ішлі на пераадоленне голаду, на забеспячэнне пітной вадой, на змаганне са СНІДам. У адказ сваю дапамогу ім пачаў прапаноўваць Кітай.
Якуб Хруст belsat.eu
