Адміністрацыя Доналда Трампа спыніла фінансаванне 5800 праектаў Агенцтва ЗША ў справе міжнароднага развіцця (USAID), што прывядзе да катастрафічных наступстваў для глабальных праграмаў аховы здароўя.
Як паведамляе «The New York Times», Дзяржаўны дэпартамент ЗША разаслаў афіцыйныя паведамленні арганізацыям ўва ўсім свеце, абвясціўшы пра спыненне фінансавання.
Пад скарачэнне трапілі жыццёва важныя праграмы, сярод якіх:
- грант для ЮНІСЭФ памерам 131 мільён долараў на імунізацыю супраць поліяміеліту (грант забяспечваў вакцынацыю мільёнаў дзяцей);
- кантракт з кампаніяй «Chemonics» на 90 мільёнаў долараў для забеспячэння супрацьмаскітнымі сеткамі, тэстамі на малярыю і лекамі, што мусілі абараніць 53 мільёны чалавек у Афрыцы;
- праграма «FHI 360» у Емене для дапамогі дзецям, якія цярпяць ад крытычнага недаядання;
- фінансаванне аперацыйных выдаткаў і 10 % бюджэту на лекі Глабальнага фонду для барацьбы са СНІДам, які ёсць асноўнай крыніцай забеспячэння супрацьтуберкулёзнымі прэпаратамі;
- праекты Фонду Элізабэт Глэйзэр для лячэння ВІЧ у Лесота, Танзаніі і Эсватыні (праекты забяспечвалі медыкаментознае падтрыманне для 350 тысячаў чалавек);
- 87 прытулкаў для ахвяраў гвалту ў Паўднёва-Афрыканскай Рэспубліцы;
- праграма «Plan International», якая забяспечвала вадой 115 тысячаў перамешчаных асобаў у Эфіопіі;
- фінансаванне памерам 80 мільёнаў долараў для праграмы ААН у справе барацьбы са СНІДам (ЮНЭЙДС).
Спыненне фінансавання закранула таксама асноўныя праграмы для ліквідацыі поліяміеліту, змагання з малярыяй у афрыканскіх краінах і дапамогі пацярпелым ад ліхаманкі Эбола ва Угандзе. Гэтая пастанова пазбаўляе падтрымання найбольш уразлівыя катэгорыі насельніцтва і пагаршае санітарныя ўмовы для ўцекачоў.
,,«Людзі будуць паміраць, але мы ніколі не даведаемся дакладнай колькасці, таму што нават праграмы для падліку памерлых скасаваныя», – заявіла выканаўчая дырэктарка Афрыканскага цэнтру даследаванняў у галіне народанасельніцтва і аховы здароўя Кэтрын Кіёбутунгі.
Дзяржаўны дэпартамент ЗША пацвердзіў канчатковасць гэтай пастановы, падкрэсліўшы, што яна прынятая «ў інтарэсах і для зручнасці ўраду ЗША». Прадстаўнікі гуманітарных арганізацыяў асуджаюць гэты крок, папярэджваючы пра магчымую гуманітарную катастрофу ў найбяднейшых рэгіёнах свету.
Нагадаем, што 21 студзеня прэзідэнт Доналд Трамп падпісаў указ аб прыпыненні замежнай дапамогі ЗША іншым краінам на 90 дзён, як было заяўлена – для ацэнкі эфектыўнасці і адпаведнасці асобных праграмаў замежнай палітыцы ЗША. Гэта закранула ў тым ліку шматлікія беларускія грамадскія арганізацыі і медыі, што працуюць у выгнанні.
Раман Шавель belsat.eu
