Урад увёў ліцэнзаванне імпарту шэрагу тавараў з драўніны. Ліцэнзію могуць не даць, калі такая прадукцыя вырабляецца ў Беларусі. Абмежаванні не дзейнічаюць на малыя партыі тавараў агульнай цаной да 1000 еўра.
Савет міністраў Беларусі прыняў 20 траўня пастанову «Аб ліцэнзаванні імпарту асобных відаў тавараў». Пастанова была афіцыйна апублікаваная 22 траўня. Асноўная яе частка набудзе моц праз месяц і будзе дзейнічаць паўгода.
Пастанова ўводзіць разавыя ліцэнзіі, якія маюць выдаваць Міністэрства гандлю па ўзгадненні з канцэрнам «Беллесбпаперпрам». Канцэрн можа адмовіць, калі пабачыць магчымасць выкарыстання ці набыцця тавараў беларускай вытворчасці, аналагічных тым, што ўвозяць.
У спісе тавараў, якія нельга ўвозіць без ліцэнзіі, наступныя:
- пліты драўнянастружкавыя (ДСП);
- пліты з арыентаванай стружкай (OSB);
- пліты драўнянавалакністыя з драўніны або іншых адраўнелых матэрыялаў з даданнем або без дадання смолаў ці іншых арганічных рэчываў, вокны, балконныя дзверы і іхныя рамы іншыя (драўляныя);
- дзверы і іхныя рамы і парогі іншыя (драўляныя);
- панэлі падлогавыя сабраныя іншыя, шматслойныя;
- папера і кардон іншыя;
- кардонкі, скрыні і скрынкі з гафраванай паперы або гафраванага кардону;
- мяхі і пакеты з паперы;
- мэбля драўляная для сталовых і жылых пакояў.
Ліцэнзіі не мусяць выдаваць на тавары паходжаннем з дзяржаваў Еўразійскага эканамічнага саюзу (Арменія, Казахстан, Кыргызстан, Расея) пры наяўнасці сертыфікату на іх або ўключэнні іх у адпаведны рэестр і на партыі тавараў аднаго коду таварнай наменклатуры агульнай цаной 1000 еўра. Таксама дазволы не патрэбныя для тавараў, якія ідуць праз Беларусь транзітам ці якія прыходзяць у Беларусь як безаплатная замежная дапамога. Для пэўных тавараў могуць быць вызначаныя квоты ўвозу.
Раней у Беларусь ужо забаранялі ўвозіць розныя тавары. Так, летам 2024 года забаранялі ўвозіць з «несяброўскіх краінаў» пліты з драўнянай стружкі, фанеру, паперу і кардон, а таксама іншыя тавары – ад лядоўняў да рыззя.
Сама Беларусь пастаўляе ў Еўразвяз прадукцыю дрэваапрацоўкі, нягледзячы на санкцыі: беларуская драўніна «ператвараецца» ў кітайскую. На экспарце прадукцыі з дрэва зарабляюць дзясяткі мільёнаў долараў: адна нелегальная партыя фанеры можа каштаваць каля 800 тысяч долараў. Пры гэтым санкцыі адчуваюцца: аб’ёмы нарыхтоўкі драўніны падаюць.
Прынамсі некаторыя прадпрыемствы дрэваапрацоўчай галіны аказваюцца стратнымі і жывуць на дзяржаўную падтрымку, а ў лясгасах пастаянна выяўляюць безгаспадарнасць.
Алесь Наваборскі belsat.eu
