Прэс-сакратар украінскага МЗС Георгій Ціхі агучыў афіцыйную пазіцыю Украіны датычна легітымнасці датэрміновых прэзідэнцкіх выбараў у Беларусі, якія адбудуцца 26 студзеня.
Паводле Ціхага, Украіна хацела б назваць галасаванне, якое адбудзецца ў Беларусі, прэзідэнцкімі выбарамі, калі б на гэта былі падставы. Але іх няма, А вынікі «гэтага дзеяння» вядомыя наперад.
Чыноўнік зазначыў, што ўкраінцам відавочна, што Лукашэнка працягвае заставацца саюзнікам і саўдзельнікам Пуціна ў ягонай вайне супраць Украіны, што адбываецца насуперак інтарэсам беларускага народу.
,,«Мы лічым, што абодва дыктатары працягнуць імітаваць бурную барацьбу з так званымі «пагрозамі калектыўнага Захаду», якімі яны запужваюць сваіх грамадзянаў, і якія не маюць ніякіх падставаў», – сказаў прэс-сакратар.
Украінскія ўлады цяпер не бачаць ніякіх перадумоваў для аднаўлення кантактаў з Лукашэнкам, таму пытанне прызнання ягонай легітымнасці пасля абвяшчэння афіцыйных вынікаў выбараў не з’яўляецца актуальным для Украіны.
Ціхі выказаў саліданасць з пазіцыяй дзяржаваў-сябраў Еўразвязу, ЗША, Канады, Вялікай Брытаніі і іншых дэмакратычных краінаў адносна адсутнасці ў Беларусі базавых умоваў для правядзення сумленных і празрыстых выбараў адпаведна са стандартамі АБСЕ.
«Няма на сённяшні дзень такіх умоваў і няма сумленных сапраўдных выбараў», – кажа прадстаўнік МЗС.
Георгій Ціхі узгадаў таксама пра фактычнае пазбаўленне права ўдзелу ў беларускіх выбарах вялікай колькасці грамадзянаў Беларусі, якія знаходзяцца за мяжой і не маюць магчымасі прыняць удзел у галасаванні, бо не могуць вярнуцца ў Беларусь праз палітычны пераслед на радзіме. Гэта таксама істотна ўплывае на вынікі галасавання, мяркуе прэс-сакратар украінскага МЗС.
,,«Мы лічым, што беларускі народ заслугоўвае права абіраць уладу на насамрэч дэмакратычных, вольных, канкурэнтных выбарах і будаваць уласную будучыню без дыктату Расеі, без яе імперскіх замахаў і без прагнення Масквы навязаць сваім сусуедзям ролю падкантрольных марыянетак, як адбываецца цяпер», – кажа Ціхі.
Прадстаўнік дыпламатычнага ведамства выказаў падзяку беларусам, якія «сёння разам з украінскім народам, асабліва са зброяй у руках даюць годны адпор расейскай агрэсіі».
«Мы лічым, што тым самым яны таксама набліжаюць і рэальныя дэмакратычныя змяненні ў сваёй уласнай краіне», – рэзюмаваў прэс-сакратар МЗС.
Прэзідэнцкія выбары ў Беларусі пройдуць у нядзелю 26 студзеня. 21 студзеня распачалося датэрміновае галасаванне. У ім прынялі ўдзел 27,15% ад агульнай колькасці выбарцаў за тры дні, сцвярджае ЦВК.
На выбарах у Беларусі не будзе назіральнікаў ад АБСЕ. Шэраг краінаў заявілі, што не прызнаюць вынікі выбараў легітымнымі.
Марыя Міхалевіч belsat.eu
