«Белсат» аналізуе вынікі чарговага тыдня поўнамаштабнай вайны, распачатай Расеяй ва Украіне. Пра становішча на фронце станам на 13 студзеня чытайце ў нашым матэрыяле.
На мінулым тыдні на тэрыторыі Курскай вобласці РФ без істотных поспехаў скончыліся наступальныя дзеянні Збройных сілаў Украіны, пасля чаго пачаўся наступ расейцаў. Украінскае камандаванне адзначыла, што толькі за 6 студзеня праціўнік правёў 98 штурмавых дзеянняў, што склала каля 43% атак за гэты дзень па ўсёй лініі фронту.
Прарасейскія крыніцы пішуць, што войскам РФ удалося цалкам выбіць праціўніка з хутару Бердзін, а таксама прасунуцца каля населеных пунктаў Паграбкі, Новая Сарочына, Кругленькае і Малая Локня. Акрамя гэтага УС РФ ціснуць каля Рускага Папярэчнага, імкнучыся выйсці з паўднёвага захаду да гораду Суджа.
Між тым адзначаецца, што ЗСУ ўсё яшчэ захоўваюць буйную групоўку войскаў на тэрыторыі Сумскай вобласці Украіны, што дазваляе тэрмінова перакідаць рэзервы да лініі сутыкнення і лакалізоўваць прарывы расейцаў.
На паўночным усходзе Харкаўскай вобласці працягваюцца баі ў ваколіцах населенага пункту Дварычна ў Купянскім раёне, дзе расейцам удалося стварыць невялікі плацдарм на правым беразе ракі Аскіл. Цяпер УС РФ намагаюцца насыціць гэты ўчастак сваёй пяхотай, каб замацавацца і развіць поспех. Адначасова з гэтым ажыццяўляецца ціск на суседні населены пункт Западнае.
У гэты ж час у Збройных сілаў назіраецца істотны недахоп у асабовым складзе, што пагражае далейшым пагаршэннем сітуацыі і ў перспектыве выхадам праціўніка з паўночнага захаду да Купянску.
На суседнім ліманскім кірунку расейцы расшыраюць свой плацдарм на правым беразе ракі Жарабец. Цягам тыдня ім удалося заняць сяло Іванаўка і пачаць рух да населенага пункту Калодзязі. Імаверна такім чынам Узброеныя сілы РФ намагаюцца абысці плацдарм ЗСУ на левабярэжжы паміж сёламі Церны і Торскае, і выйсці да Зарэчнага, ад якога ў далейшым адкрываецца магчымасць рухацца ў кірунку гораду Ліман.
На краматорскім кірунку асноўныя баі па-ранейшаму лакалізуюцца на тэрыторыі гораду Часаў Яр і ягоных ваколіцаў. Тут расейцы маюць поспех у мікрараёнах «Новы» і «Жоўтневы», таксама яны занялі мясцовы вогнетрывалы камбінат. Адначасова з гэтым назіраецца цяжкая для ЗСУ сітуацыя ў раёне «Паўночны», дзе войскі РФ намагаюцца замацавацца, каб далей пачаць рух да заходніх ускрайкаў гораду.
Акрамя гэтага працягваюцца расейскія штурмы на поўдні ад Часавага Яру ў ваколіцах трасы на суседні горад Канстанцінаўка. Пакуль украінцам удаецца ўтрымліваць гэты стратэгічны ўчастак.
Сітуацыя на краматорскім кірунку ў значнай ступені залежыць і ад баёў на суседнім тарэцкім, дзе пад кантролем ЗСУ застаецца толькі невялікая частка аднайменнага гораду. У выпадку поўнага захопу Тарэцку перад расейцамі адкрыецца дарога да паўднёвых ускрайкаў Канстанцінаўкі.
Між тым украінскія вайскоўцы пішуць, што за Тарэцкам удалося пабудаваць новую лінію абароны, якая з улікам мясцовых вышыняў дазволіць на нейкі час спыніць праціўніка.
Агулам па завяршэнні абароны тарэцкай агламерацыі варта адзначыць, што хоць ЗСУ і не ўдалося ўтрымаць пазіцыі, яны ўсё змаглі спыніць флангавыя ўдары праціўніка, што вымусіла расейцаў атакаваць гарадскія кварталы ў лоб. А гэта ў сваю чаргу прывяло да большых стратаў сярод УС РФ, а таксама істотна расцягнула па часе самую аперацыю.
На пакроўскім кірунку расейцы працягваюць атакі з поўдня ад гарадоў Пакроўск і Мірнаград, але сур'ёзны рух на гэтых участках з далейшымі лабавымі штурмамі гэтых населеных пунктаў пакуль бачыцца малаверагодным. У гэты ж час больш лагічным выглядае прасоўванне з паўднёвага захаду ад Пакроўску, што дазволіць пагоршыць лагістыку ўкраінцаў, якая ў асноўным і завязаная на гэтым кірунку. Па гэтай жа прычыне верагодным будзе заход расейцаў і ў суседнюю Днепрапятроўскую вобласць, што дазволіць ахапіць агламерацыю па больш шырокім радыусе.
На курахаўскім кірунку, пасля захопу аднайменнага гораду, расейцы не сталі браць паўзу і працягнулі рух далей на захад у бок населенага пункту Дачнае. Адначасова з гэтым ажыццяўляецца ціск на пазіцыі сілаў абароны на поўначы і поўдні кірунку, што ўказвае на жаданне расейцаў абысці Дачнае з флангаў і атачыць праціўніка па лініі Шаўчэнка – Улаклы – Зялёнаўка.
На іншых участках фронту адзначаюцца лакальныя пазіцыйныя баі, а таксама артылерыйскія абстрэлы ўздоўж лініі сутыкнення.
Ва ўмовах актыўных баявых дзеянняў журналісты не маюць магчымасці аператыўна правяраць афіцыйныя паведамленні ўдзельнікаў вайны.
Наталля Кулыгіна belsat.eu
