У Малых Сяхновічах (Жабінкаўскі раён Берасцейскай вобласці), якімі род Касцюшкаў валодаў некалькі стагоддзяў, знеслі самы першы ў краіне помнік Тадэвушу Касцюшку – нацыянальнаму герою, правадыру паўстання 1794 года, славутаму нарадзінцу Беларусі, якога шануюць у нашай краіне і іншых краінах свету.
Гэты помнік у 1932 годзе стварыла беларуская скульптарка Бальбіна Відацкая-Світыч, на тэрыторыю былой сядзібы яго паставілі ў 1988 годзе.
На апошніх здымках з раённай газеты «Жабінка» замест помніка стаіць клумба, заўважыла «Спадчына». Акрамя таго, з сайту музею, каля якога стаяў помнік, прыбралі любыя згадкі пра Тадэвуша Касцюшку. Пры тым, што дзеля ўшанавання ягонай асобы і быў створаны гэты музей.
Нагадаем, у 2023 годзе кіраўнік лукашэнкаўскай адміністрацыі Ігар Сергеенка ў інтэрв’ю «Sb.by» заявіў, што не ўважае Тадэвуша Касцюшку і Кастуся Каліноўскага нацыянальнымі героямі Беларусі. У тым жа годзе ва ўстановы адукацыі разаслалі «рэкамендацыі», як настаўнікам «правільна» выкладаць гісторыю, літаратуру, грамадазнаўства ды іншыя прадметы.
Паводле загаду вучням пачалі тлумачыць, што Тадэвуш Касцюшка – патрыёт Польшчы, ягоная мэта – адрадзіць Рэч Паспалітую ў межах 1772 года. А беларусам паражэнне паўстання Касцюшкі і падзелы Рэчы Паспалітай дазволілі захавацца як народу. У красавіку 2024 года са сцяны Новага замку ў Горадні таксама знікла памятная шыльда ў гонар Тадэвуша Касцюшкі, што вісела там 30 гадоў.
Тэса Анэйда belsat.eu
