Камітэт дзяржкантролю Гомельскай вобласці паведаміў, што затрымаў 11 менеджараў буйной сеткі гандлю ўжываным адзеннем.
Вядзецца пра рознічную сетку, што мае 97 крамаў у 12 гарадах, у тым ліку ў Менску, Гомлі, Горадні, Магілёве і буйных райцэнтрах. Хутчэй за ўсё, гаворка пра сетку «Адзенне з Еўропы», якую паказалі ў сваім відэа сілавікі. У дваіх з 11 затрыманых менеджараў адразу знайшлі прыкметы дачынення да экстрэмісцкай дзейнасці.
Паводле сілавікоў, уладальнікі сэканд-хэндаў незаконна раздрабнілі свой бізнес і недаплацілі ў бюджэт краіны больш за 3,8 мільёна рублёў. Гэта ўдалося праз стварэнне 12 асобных кампаніяў, на якія аформілі новыя гандлёвыя пункты, і потым падзялялі паміж імі выручку, каб карыстацца спрошчанай сістэмаю падаткаабкладання.
«Пры сілавым падтрыманні АМАП арыштаваная маёмасць падазраваных (15 аб'ектаў нерухомасці, 8 аўтамабіляў) агульным коштам 5,5 млн рублёў. Сканфіскаваныя 315 тыс. долараў ЗША і 150 тыс. еўраў, а таксама зліткі золата агульнай вагой 500 г», – піша тэлеграм-канал Камітэту дзяржкантролю.
Супраць уладальнікаў бізнесу распачалі крымінальную справу за ўхіленне ад падаткаў у асабліва буйным памеры, махлярства і нават удзел у злачыннай групе. Таксама паведамляецца, што затрыманыя ўжо вярнулі 1,9 мільёна рублёў у якасці частковага пакрыцця шкоды.
Гандлёвыя пункты працягваюць працу, іх дзейнасць не прыпынялася.
Нагадаем, літаральна на мінулым тыдні, 15 траўня, сілавікі прыйшлі ў цэнтральны офіс кампаніі «Еўрагандаль», што валодае сеткай «Еўраопт», а 16-га – і ў офіс «Дабраному», другой паводле колькасці гандлёвых аб’ектаў сеткі ў Беларусі.
Усё гэта таксама вельмі нагадвае нядаўнія ператрусы і затрыманні ў агенцтвах нерухомасці. Першыя як мінімум восем рэйдаў адбыліся 8 красавіка, 10 красавіка сталася вядома пра рэйды як мінімум у двух іншых агенцтвах нерухомасці, 11 красавіка – пра яшчэ адзін. І гэта толькі тыя выпадкі, пра якія вядома, але сілавікі ніяк гэта не каментавалі.
Адная з крыніцаў «Белсату» паведаміла, што гэта можа быць звязанае з тым, што некаторыя кампаніі нерухомасці завялі сабе «дублёраў», каб атрымліваць большы прыбытак праз тое, што пакупнік плаціць агенту за паслугі, якія і так ужо аплаціў прадавец.
Тэса Анэйда belsat.eu
