У Палаце прадстаўнікоў адсправаздачыліся, што дэпутаты правялі «маніторынг тавараў з дзяржаўнай сімволікаю». Рэвізію зладзілі ў 30 крамах, там спраўдзілі асартымент і паглядзелі, ці паводле ўсіх правілаў прадаюць чырвона-зялёныя сцяжкі. У сакратарыяце парламенту назвалі гэта звычайнай справаю, а ў адной краме, куды датэлефанаваўся «Белсат», прызналіся, што чэргаў па «патрыятычныя» тавары няма.
Паводле паведамлення ў Telegram-канале Палаты прадстаўнікоў, дэпутаты мелі запэўніцца, што тавары з чырвона-зялёнай сімволікаю прэзентаваныя ў шырокім асартыменце і што выконваюцца патрабаванні выкладання гэтых тавараў. Яны мусяць візуальна вылучацца на фоне іншых тавараў і «суправаджацца інфармацыйным надпісам „Дзяржаўныя сімвалы Рэспублікі Беларусь“».
У некаторых крамах пільныя дэпутаты заўважылі, што «патрыятызм» прадаецца не так, як мае быць, і на гэта «была акцэнтаваная ўвага кіраўнікоў гандлёвых аб'ектаў».
Збольшага рэвізораў задаволіў «досыць шырокі выбар тавараў гэтай катэгорыі».
Адзначаецца, што кошты на прадукцыю з дзяржаўнай сімволікаю розныя. За папяровы сцяжок на палачцы бяруць ад 75 капеек да 2 рублёў, за сцяжок з тканіны – ад 7 да 9 рублёў. На падстаўцы яны даражэйшыя: папяровыя – 2,4 рубля, з тканіны – 7,38–9,72 рубля.
Супадзенне ці не, аднак дэпутаты зладзілі такое інспектаванне пасля абурэння беларуса ў сацсетцы «Threads». Ён напісаў, што ад «нашых ідэолагаў» адчувае збянтэжанасць:
«17 рублёў за папяровы сцяжок на пластыкавай палачцы???? Алё, вы там зусім ку-ку? Мне хацелася б даведацца фірму-вытворцу, што зарабляе адсоткаў 800 на такіх таварах. У іншых краінах гэта прынята бясплатна раздаваць».
«Яны гэта стала робяць»
У Палаце прадстаўнікоў не адразу далі рады з тлумачэннямі наконт гэтага маніторынгу. Адзін работнік аддзелу ў справе зваротаў грамадзянаў і юрыдычных асобаў нават не ведаў, што інфармацыю пра гэта апублікавалі ў Telegram-канале палаты.
«Пэўна, для нечага гэта патрэбна было», – сказаў работнік пра дэпутацкую рэвізію і запытаў: «А дзе вы такую інфармацыю знайшлі?»
Ягоная каляжанка з таго ж аддзелу, з якой карэспандэнт «Белсату» паразмаўляў як прыватная асоба, аказалася больш дасведчаная:
«Дэпутаты ходзяць у свой працоўны час, ім за гэта не даплачваюць. Разам з гэтым яны праводзяць маніторынг цэнаў на садавіну і гародніну, на хлеб, агулам на наяўнасць тавараў у гандлёвых сетках. Яны стала гэта робяць. Гэтым разам была дзяржаўная сімволіка».
Нашая суразмоўніца ўпэўненая, што парламентарыі робяць добрую справу:
«Яны глядзяць і ўзровень цэнаў, і выкананне парадку выкладання гэтых тавараў, у тым ліку ў прыкасавых зонах. Сцяжок можа каштаваць рэальна 2 рублі, а на прыкасавай тэрыторыі стаіць за 15 рублёў – такое ж можа быць?»
Калі рэвізоры знаходзяць нейкае парушэнне, пра гэта інфармуюць Міністэрства антыманапольнага рэгулявання і гандлю, падкрэсліла чыноўніца.
«Гэта для мітынгу і дэманстрацыі»
«Патрыятычны» маніторынг дэпутаты зладзілі ў 30 крамах у Менску, Гомлі, Светлагорску, Століне і Ваўкавыску.
Карэспандэнт «Белсату», назваўшыся мясцовым жыхаром, патэлефанаваў у некалькі светлагорскіх крамаў.
«Ёсць сцяжкі, два віды або тры нават, кубак, ручнік, нешта такое ёсць. Насупраць касаў усё стаіць», – сказалі ў адным гастраноме.
У другой краме запрашалі на месцы вывучыць асартымент і прызналіся, што ў якасці падарункаў дзяржаўныя сцяжкі не бяруць:
«Ёсць сцяжкі на падстаўцы, ёсць ручнічкі з сімволікаю штучныя, ёсць у наборах. Маем магніты недарагія, бірулькі. Сцяжкі збольшага ідуць для мітынгу, дэманстрацыі. Сцяжкі ў падарунак дакладна не купляюць».
А ў трэцяй краме канстатавалі, што чэргі па «патрыятычныя» тавары не стаяць:
«Сцяжкі мы маем у продажы, недарагія звычайныя сцяжкі. Стаяць на касе. Не думаю, што там ажно чарга па іх стаіць».
Дар'я Форман, Сцяпан Кубік belsat.eu
