У французскай сталіцы 7 снежня пачынаецца цырымонія адкрыцця касцёлу Нотр-Дам-дэ-Пары пасля пяцігадовае рэстаўрацыі і аднаўлення ад наступстваў зруйнавальнага пажару. Цырымонія будзе доўжыцца ўсе выходныя.
Падчас адкрыцця будзе зачытанае пасланне Папы Рымскага Францішка да французскага народу. Прэзідэнт Францыі Эманюэль Макрон выступіць з прывітальнаю прамоваю. Сярод ганаровых гасцей падзеі – прэзідэнт ЗША Доналд Трамп, прэзідэнт Украіны Уладзімір Зяленскі, прэзідэнтка Грузіі Саламэ Зурабішвілі і брытанскі прынц Ўільям. Агулам запрошаныя каля 1500 асобаў, адзначае RFI.
На канцэрце будзе граць скрыпач беларускага паходжання
У праграме ўрачыстая частка – у жывым эфіры і запісаны напярэдадні святочны канцэрт. Праз неспрыяльныя ўмовы надвор’я ўся цырымонія праходзіць унутры сабору.
Жывую трансляцыю, што пачнецца а 19-й гадзіне паводле парыжскага часу, будуць паказваць тэлеканалы больш як 20 краінаў ува ўсім свеце. Арцыбіскуп Парыжу Лёран Ульрых сімвалічна адчыніць драўляныя дзверы касцёлу, пасля чаго пробашч Нотр-Даму, ксёндз Аліўе Рыбада Дзюма пагрукае ў дзверы сабору кіем з абвугленай драўніны, выратаванай з даху катэдры, пацярпелай ад пажару, і абвесціць яе зноў адкрытаю.
А 21:30 пачнецца трансляцыя запісанага загадзя канцэрту. У яго праграме выступ канадскага спевака Гару, вядомага сваёй роляй Квазімода ў мюзікле «Нотр-Дам-дэ-Пары». Таксама выступяць амерыканскі спявак Фарэл Ўільямз, бенінская спявачка Анжэлік Кіджо, французскія спевакі Кляра Люсьяні, Віянэ ды іншыя. Таксама на канцэрце будзе граць шведскі скрыпач Даніэль Лазаковіч беларуска-кіргізскага паходжання.
У дзень адкрыцця катэдры Маці Божай Парыжскай у яе ваколіцах уведзеная «выключная» сістэма бяспекі, як падчас мінулых Алімпійскіх гульняў. У цэнтры Парыжу ў тым ліку задзейнічаная сістэма барацьбы з дронамі. Рух катараў і лодак па Сене перакрыты.
Ужо можна замаўляць квіткі
Пачынаючы з 7 снежня ахвочыя могуць рэзерваваць бясплатны квіток у Нотр-Дам у суботу праз сайт, сацсеткі або адмысловы дадатак, каб трапіць у касцёл у той самы дзень або цягам двух дзён пасля браніравання. Акрамя таго, будзе адкрытая жывая чарга для тых, хто хоча трапіць у касцёл без папярэдняй рэзервацыі. Касцёл чакае да 15 мільёнаў наведнікаў штогод.
Касцёл Маці Божай Парыжскай пабудаваны ў 1163–1257 гадах на месцы першай хрысціянскай царквы Парыжу – базілікі Святога Стэфана, якая з'явілася, у сваю чаргу, на месцы гальска-рымскага храму Юпітэра. 15 красавіка 2019 года ў катэдры пачаўся моцны пажар, што быў патушаны толькі ранкам 16 красавіка. Агонь прывёў да сур’ёзных разбурэнняў будынку – абваліўся шпіль і дах, унутранае ўбранне сабору было пашкоджанае высокаю тэмператураю.
Якуб Хруст belsat.eu
