Падчас паездкі ў Гарадзенскую вобласць Аляксандр Лукашэнка пацікавіўся, ці развязаная праблема з бульбай у рэгіёне, а таксама даў беларусам указанне – не есці шмат бульбы, а то патаўсцеюць, перадае ягоная прэс-служба.
Прадстаўнік Аляксандра Лукашэнкі па Гарадзенскай вобласці Васіль Герасімаў запэўніў, што на Гарадзеншчыне праблемаў з бульбаю, на адсутнасць і якасць якой скардзіліся па ўсёй Беларусі, няма і не было.
«У Гарадзенскай вобласці свае абавязкі ў стабілізацыйных фондах летась выканалі», – Васіль Герасімаў.
Як сцвярджае прэс-службы Лукашэнкі, гэта азначае, што ўвесну людзі былі забяспечаныя бульбай, а калі ў гандлёвых сетак з'явіліся праблемы, ім пастаўлялі бульбу са стабілізацыйных фондаў.
,,«Глядзіце, каб не было [праблемаў] у будучым годзе. Паклікаў [сельскагаспадарчых вытворцаў]: ты нарыхтуй столькі, столькі, столькі. Колькі трэба – у рэзерв, у сябе трымаеце, але каб хапала. Я разумею, вядома, у Расеі ў 2-3 разы даражэйшая была бульба. Хтосьці ж хоча зарабіць – сяляне вывозілі, фермеры вывозілі. З аднаго боку. Ну а з другога – нейкі там выявілі сабатаж», – сказаў Лукашэнка.
«Я вялікіх праблемаў не бачу, зʼяўляецца ўжо першая бульба ў нас», – сказаў Лукашэнка.
Ён таксама параіў беларусам не есці бульбы зачаста, бо гэта можа дрэнна адбіцца на фігуры:
,,«Калі мы будзем есці бульбу, як пішам у "тыктоках", то худзенькімі не будзем. Адзін раз на тыдзень, два максімум, і тое запечаную, пюрэ».
Увесну 2025 года ў Беларусі быў бульбяны крызіс. Людзі не маглі набыць гародніны ўвогуле альбо яна была надта дрэннай якасці. Беларускі сегмент TikTok апанавалі абураныя спажыўцы. Пасля гэтага Лукашэнка ладзіў разборкі з чыноўнікамі.
Як высветліў «Белсат», у пачатку года Беларусь прадавала буйныя партыі бульбы ў Малдову. Таксама СМІ паведамлялі аб продажах у Расею. Мяркуючы з малдаўскіх навінаў, якасць бульбы была вельмі добрая. І ў цэлым у 2023–2024 гадах Беларусь стала нарошчваць продажы бульбы ў Еўропу. Павелічэнне паставак супала з увядзеннем у канцы 2022-га жорсткага цэнавага рэгулявання. Імаверна, прадаўцам было больш выгадна прадаць бульбу за мяжу. Акрамя таго, частка бульбы ў Беларусі магла проста згніць праз дрэнныя ўмовы захоўвання, апавёў эксперт у сферы сельскай гаспадаркі Мікалай Лысянкоў.
Арсен Рудэнка belsat.eu
