У найбліжэйшы час у Беларусь запланаваны чарговы завоз чыгуначным транспартам авіяцыйных сродкаў паражэння . Пра гэта паведамляе «Супольнасць беларускіх чыгуначнікаў» са спасылкай на свае крыніцы і аналіз цяперашняй актыўнасці на Беларускай чыгунцы (БЧ).
Паводле чыгуначнікаў, з 14 да 30 чэрвеня з Расеі ў Беларусь чыгуначным транспартам завязуць авіябомбы і ракеты розных тыпаў. Станцыямі прызначэння гэтых грузаў ёсць Ліда (Гарадзенская вобласць) і Прудок (Віцебская). Размешчаны побач са станцыяй Прудок арсенал забяспечвае ўсе асноўныя і рэзервовыя вайсковыя аэрадромы Беларусі. Гэта адзіны падобны абʼект у краіне.
Работнікам чыгункі загадалі быць максімальна пільнымі ў дачыненні старонніх асобаў і нетыповых патэнцыйна небяспечных прадметаў.
Меркаваны да ўвозу ў Беларусь абʼём авіяцыйных сродкаў паражэння разлічаны як мінімум на два вайсковыя эшалоны. Дату і станцыі адпраўлення расейскіх авіяцыйных боепрыпасаў, а таксама іх дакладны абʼём выявіць пакуль не ўдалося.
На IV Канферэнцыі беларусаў і беларусак свету 23 траўня ў Варшаве арганізацыя былых беларускіх сілавікоў «BELPOL» прэзентавала справаздачу «Удзел рэжыму Лукашэнкі ў расейскай агрэсіі супраць Украіны». Улады ведалі пра рыхтаванне нападу Расеі на Украіну задоўга да пачатку ўварвання і праз тры гады яшчэ больш уцягваюць нашую краіну і яе цывільнае насельніцтва ў вайну, сцвярджаюць белполаўцы.
Якуб Хруст belsat.eu
