Расейскі холдынг VK запусціў у Беларусі і Расеі «дзяржаўны» мэсэнджар «Max». «Наша Ніва» паглядзела, як працуе сэрвіс, і знайшла ў ім праблемы з бяспекаю.
Дызайн «Max» нагадвае Telegram і WhatsАpp. У ім можна перапісвацца, тэлефанаваць, запісваць галасавыя і відэапаведамленні, дасылаць файлы. Праўда, на сёння «Max» мае толькі каля 100 тысяч спампоўванняў на «Google Play», тады як Telegram – больш як мільярд. З восені «Max» пачнуць прымусова ўсталёўваць на ўсе смартфоны і планшэты, што будуць прадаваць у Расеі. А ў праграму абяцаюць дадаць функцыі электроннага подпісу і лічбавага пашпарту, здзяйсняць банкаўскія аперацыі. Але гэта датычыць перадусім жыхароў Расеі.
Пры гэтым ёсць пытанні да бяспекі праграмы. Гэтак, зарэгістравацца ў ёй можна толькі з дапамогай расейскай ці беларускай сім-карткі. А выдаліць профіль не ўдасца хутка – можна толькі падаць заяўку на выдаленне, а кампанія мусіць яе задаволіць праз 30 дзён і выдаліць ваш акаўнт незваротна. Стваральнікі праграмы не тлумачаць, навошта трэба гэтыя 30 дзён і якім чынам задавальняюць заяўкі на выдаленне акаўнту.
Расейскае выданне «Важные истории» заявіла пра сувязь мэсэнджару Telegram з расейскай Федэральнай службай бяспекі і іншымі сілавымі структурамі. Расследаванне аднак нямала крытыкавалі: сувязь з ФСБ далёка не ўсе палічылі даказанай, а пазначаныя «дзіры» ў бяспецы, магчыма, не настолькі крытычныя.
У Telegram адказалі выданню «Вот Так»: кампанія працуе з дзясяткамі падрадчыкаў ва ўсім свеце, аднак ніводзін з іх не мае доступу да звестак карыстальнікаў або крытычна важнай інфраструктуры, «усе серверы Telegram належаць Telegram і абслугоўваюцца работнікамі Telegram», шыфраванне Telegram ніколі не было ўзламанае, паведамленняў карыстальнікаў ніколі не перадавалі трэцім асобам. Беларускія «Кіберпартызаны» заклікаў не карыстацца сэрвісам не рабілі.
Якуб Хруст belsat.eu
