У Беларусі з 13 на 14 чэрвеня прайшлі выпускныя вечары для навучэнцаў 11-х класаў. Агулам сёлета выпускнікамі 11-х класаў сталіся больш за 56 тысяч маладзёнаў. У розных гарадах таксама ладзіліся супольныя выпускныя для розных школаў.
У Берасці прайшоў штогадовы выпускны баль «Пунсовыя ветразі», назва якога адсылае да аналагічнай падзеі ў расейскім Санкт-Пецярбурзе. Выпускнікі школаў Ленінскага раёну гораду прайшлі па цэнтральнай вуліцы, а ў Парку культуры і адпачынку ўшаноўвалі выбітных выпускнікоў, перадае БелТА.
Агульнагарадскі «Зорны выпускны» сабраў на плошчы Адзінства ў Магілёве больш як 1,9 тысячы выпускнікоў. Гэдлайнерам канцэрту стаўся расейскі гурт «На-На», які нашмат старэйшы за сённяшніх выпускнікоў, і расеец Ваня Дзмітрыенка.
У Горадні выпускнікі, якія мусяць прадстаўляць будучыню гораду, прайшліся шэсцем ад плошчы Леніна да Савецкай плошчы, дзе таксама адбыўся канцэрт, на якім выпускнікі разам спявалі старую савецкую песню «Крылатые качели».
У Гомлі для выпускнікоў была праведзеная дыскатэка пад жывы гук кавэр-бэнду. А ў Менску выпускнікі Заводскага раёну сабраліся на «Чыжоўка-Арэне», дзе іх вітаў намеснік старшыні Менгарвыканкаму Андрэй Стрыгельскі.
Нагадаем, што міліцыя ўзмацніла ў школах перад выпускнымі вечарамі прапускны рэжым, было ўведзенае дзяжурства міліцыянтаў, а на прылеглай тэрыторыі – групаў хуткага рэагавання. Апроч таго, у Беларусі былі ўведзеныя дні цвярозасці – быў забаронены продаж алкаголю 13 і 14 чэрвеня.
У МУС заяўлялі, што за распіванне алкаголю ў грамадскіх месцах прадугледжаная адміністратыўная адказнасць, а дзецям да 16 гадоў забаронена быць уначы па-за домам без суправаджэння дарослых.
Якуб Хруст belsat.eu
