Расейскія войскі ў ночы з 13 на 14 чэрвеня працягвалі атакаваць беспілотнікамі Украіну, знішчыўшы ў выніку склад гуманітарнай дапамогі. Украінскія ж беспілотнікі атакавалі адзін з найбуйнейшых у РФ хімічных заводаў.
Міністэрства абароны Расеі заявіла, што з 20:00 13 чэрвеня да 07:00 14 чэрвеня паводле маскоўскага часу дзяжурнымі сродкамі СПА перахопленыя і знішчаныя 66 украінскіх беспілотных лятальных апаратаў самалётнага тыпу над тэрыторыямі Белгародскай, Варонежскай і Самарскай вобласцяў, Стаўрапольскага краю, акупаванага Крыму і над акваторыяй Азоўскага мора.
У прыватнасці, беспілотнікі атакавалі адзін хімічны завод у горадзе Нявіннамыск Стаўрапольскага краю. Губернатар рэгіёну Уладзімір Уладзіміраў паведаміў аб падзенні абломкаў дронаў у прамзоне гораду. Паводле яго, атака была накіраваная на хімічнае прадпрыемства «Нявіннамыскі Азот» – адзін з найбуйнейшых вытворцаў азотных угнаенняў і аміяку ў РФ, а азотная кіслата актыўна выкарыстоўваецца пры вытворчасці выбуховых рэчываў. Першапачаткова губернатар паведаміў аб адным пацярпелым, аднак пасля ўдакладніў, што ў выніку інцыдэнту ніхто не пацярпеў.
Паветраныя сілы Украіны ў сваю чаргу заявілі пра атаку 58 расейскіх ударных БПЛА, з якіх 23 былі збітыя і 20 – лакацыйна страчаныя. Асноўнымі напрамкамі паветранага ўдару былі Харкаўская, Данецкая, Днепрапятроўская і Запарожская вобласці. Зафіксаванае траплянне сродкаў паветранага нападу праціўніка ў дзевяці месцах, падзенне збітых у пяці.
Начальнік Запарожскай абласной ваеннай адміністрацыі Іван Фёдараў адзначыў, што расейскія войскі атакавалі Запарожжа 14 дронамі-камікадзэ тыпу «шагэд». У выніку атакі пацярпелі двое паліцыянтаў, загарэлася гуманітарнае прадпрыемства, пашкоджаныя аўтамабілі, крама і прыпынак грамадскага транспарту. Выбухной хваляй выбіла вокны ў шматпавярховіках. Як піша радыё «Свабода», у Запарожжы праз атаку РФ знішчаны склад з гуманітарнай дапамогай – не менш як 100 тонаў на 3 млн долараў.
У Херсонская абласной вайсковай адміністрацыі заяўляюць, што расейскія вайскоўцы білі па жылых кварталах населеных пунктаў вобласці, у прыватнасці пашкодзілі шматпавярховік і шэсць прыватных дамоў. Таксама пашкодзілі аўтазаправачную станцыю, газаправод, гараж і прыватныя аўтамабілі. На Сумшчыне расейцы атакавалі 30 скідамі з БПЛА і 10 авіябомбамі – параненых і загінулых няма.
Паводле падлікаў Генштабу ЗСУ, за час вайны з Украінай РФ страціла ў вайне больш як адзін мільён чалавек асабовага складу. Сюды ўваходзяць як забітыя, так і параненыя.
Якуб Хруст belsat.eu
