Аляксандр Лукашэнка 10 сакавіка падпісаў указ «Аб прызыве афіцэраў запасу на вайсковую службу». Гэтая навіна можа насцярожыць на тле чутак аб магчымым уступленні беларускага войска ў вайну ва Украіне, аднак такія ўказы з’яўляюцца штовесну.
Згодна ўказу, на службу ва Узброеныя сілы збіраюцца прызваць з запасу 230 мужчынаў ва ўзросце да 27 гадоў, а ў органы памежнай службы – 20 афіцэраў запасу, якія праходзілі навучанне паводле адпаведных праграмаў на вайсковых кафедрах і факультэтах. Прызыў тычыцца тых, хто не праходзіў тэрміновую ваенную службу і не мае права на адтэрміноўку.
Падобныя ўказы прымаліся і ў мінулыя гады, звычайна – вясною. Выключэннем стаў 2022 год, калі такі ўказ прынялі 24 лютага – у дзень поўнамаштабнага расейскага нападу на Украіну, у якім Беларусь выступіла ў якасці суагрэсара. Тады з запасу прызывалі нават менш, «да 150 чалавек».
У 2021-м, у 2020-м, 2019-м і 2018-м з запасу прызывалі «да 100» афіцэраў. З чым цяпер звязаны рост колькасці прызваных з запасу, ва ўказе не тлумачаць.
Алесь Наваборскі belsat.eu