Гандбольны клуб «Віцязь» абвесціў пра сваё вяртанне на гандбольную пляцоўку. Прыпыніўшы дзейнасць пасля выказвання салідарнасці з пратэстамі ў 2020 годзе, клуб аднаўляецца ў Літве. Аб гэтым паведамляе тэлеграм-канал «Віцязя».
29 чэрвеня гандбольны клуб «Віцязь» абвесціў пра вяртанне на гандбольную пляцоўку пасля часовага перапынку. Заснаваны ў 2012 годзе ў Менску, гэты спартовы клуб дасягнуў значных поспехаў, перш чым падзеі 2020 года вымусілі яго часова спыніць дзейнасць.
«Выконваючы абяцанне – “Мы яшчэ згуляем”, – ГК “Віцязь” вяртаецца», – гаворыцца ў паведамленні.
На цяперашні момант клуб вядзе перамовы з афіцыйнымі прадстаўнікамі Федэрацыі гандболу Літвы і літоўскай гандбольнай лігай аб тым, каб нашую каманду дапусцілі да ўдзелу ў чэмпіянаце Літвы па гандболе. Таксама ГК «Віцязь» выказаў шчырую падзяку сваім заўзятарам, якія падтрымлівалі клуб падчас яго часовай адсутнасці.
«У жніўні 2020-га мы падтрымалі народ, а вы засталіся з намі. Ваша нязменная падтрымка была крыніцай натхнення і матывацыі, і мы рады, што вы зноў з намі, калі мы разам адпраўляемся ў гэтае захапляльнае падарожжа», – звярнуўся клуб да сваіх прыхільнікаў.
Гандбольная каманда працуе над прыцягненнем да супрацы новых партнёраў і спонсараў і запрашае да кантакту ўсе зацікаўленыя бакі. Прадстаўнікі клубу ўпэўненыя, што такая супраца дапаможа зрабіць гандбольную каманду інструментам яднання беларусаў.
Антон Тачняк belsat.eu