Польскі праязны дакумент для іншаземца з’яўляецца эквівалентам пашпарту, выдадзенага польскім грамадзянам. Ён можа служыць не толькі для перасячэння мяжы, але і для пацверджання асобы яго ўладальніка. Такую інтэрпрэтацыю ад МУС Польшчы атрымала кіраўніца аддзелу прававой дапамогі Цэнтру беларускай салідарнасці Вольга Дабравольская.
У ёй таксама адзначаецца, што пры падачы заявы на часовы ці пастаянны від на жыхарства, від на жыхарства доўгатэрміновага рэзідэнта ЕЗ іншаземец можа падаць дзейны польскі праязны дакумент, калі ў яго няма магчымасці прадставіць свой беларускі пашпарт ці іншы праязны дакумент.
ЦБС тлумачыць, чаму гэта так важна.
Беларусы змогуць карыстацца польскім праязным дакументам у якасці дакументу, які пацвярджае іх асобу:
- у адміністрацыйных органах;
- у банках;
- пры перасячэнні мяжы;
- у іншых выпадках, калі неабходна засведчыць іх асобу.
«Гэтая інтэрпрэтацыя можа стаць важным аргументам у спрэчных сітуацыях і мае істотнае значэнне для грамадзян Беларусі ў Польшчы», – адзначаюць у Цэнтры.
«Такая інтэрпрэтацыя моцна спросціць жыццё многім беларусам у Польшчы, якія не могуць атрымаць або замяніць беларускі пашпарт», – падкрэсліваюць прадстаўнікі ЦБС.
Польскі праязны дакумент для замежніка выдаецца тэрмінам на адзін год і дае права перасячэння мяжы, цалкам замяняючы нацыянальны пашпарт.
З 1 ліпеня па 31 снежня 2023 года беларусы могуць атрымліваць польскі праязны дакумент для замежніка па спрошчанай схеме – зараз беларусам не трэба даказваць, што яны не могуць атрымаць новы пашпарт ад беларускіх уладаў. Выдаецца дакумент бясплатна.
СП, belsat.eu
