Заходнія медыі паведамілі, што Пуцін прыняў рашэнне атакаваць Украіну і што найбольш верагодная дата нападу – 16 лютага. «Белсат» пераказвае галоўныя навіны 12 лютага – большасць з іх пра магчымасць вайны.
Ужо 14 краінаў свету заклікалі сваіх грамадзян пакінуць Украіну праз пагрозу вайны. Расейскія дыпламаты пачалі пакідаць Украіну. Больш за 230 навукоўцаў з Беларусі, Польшчы, Літвы, Украіны і Расеі выступілі з адкрытым зваротам супраць расейскай агрэсіі.
Прэзідэнт Украіны заклікаў не панікаваць: казаў, што разумее ўсе рызыкі, але прасіў перадаць яму дакладную інфармацыю пра «стоадсоткавае ўварванне ва Украіну», калі такая ёсць. Украінцы выйшлі на «Марш еднасці» ў Кіеве – беларусы падтрымалі.
Сілы спецыяльных аперацыяў Беларусі перакінулі да мяжы з Украінай. У Сенаце ЗША прапануюць увесці санкцыі супраць Беларусі за садзейнічанне расейскай агрэсіі. Пра вайну ў Беларусі пытаў турэцкі міністр замежных справаў.
На тле пагрозы з боку Беларусі Украіна стала пільна даглядаць беларусаў на мяжы – і многім адмаўляць. У ліку тых, каго не пусцілі ва Украіну, быў і журналіст Мікіта Мелказёраў, які прыляцеў у Кіеў нават не з тэрыторыі Беларусі.
Пакуль жа трываюць тэлефонныя перамовы з Расеяй.
Спачатку Дзяржаўны сакратар ЗША заклікаў Расею да дээскалацыі, прыгразіў рашучым адказам на ўварванне ва Украіну. Потым Пуціну патэлефанаваў Макрон, а затым Пуцін – Лукашэнку. Урэшце Байдэн набраў Пуціна.
Сенсацыйных вынікаў няма: дамовіліся аб далейшых кантактах, а ЗША па-ранейшаму не выключае, што Расея можа пачаць вайну.
У Беларусі ж ні дня не абыходзіцца без палітычных рэпрэсіяў, затрыманняў і судоў. Сёння стала вядома, што затрымалі былога сілавіка, галоўнага спецыяліста «Белаграпрамбанку» Алега Ермакова, а палітвязня Аляксандра Івуліна этапавалі ў баранавіцкае СІЗА.
Сілавыя ведамствы практычна штодзень паведамляюць пра чарговыя палітычныя затрыманні, у Telegram-каналах абражаюць затрыманых і здзекуюцца з іх затрымання, а з нядаўняга часу пачалі пісаць, што «перакрэсліваюць» людзей. На фоне гэтага гімназію ў Горадні назвалі ў гонар ініцыятара чырвонага тэрору.
Філосаф Уладзімір Мацкевіч, імаверна, трымае за кратамі галадоўку 9-ы дзень. Пасля 10 дзён, калі яго не вызваляць пад падпіску, ён абяцаў распачаць сухую галадоўку. Беларускі Хельсінскі камітэт звярнуўся ў ААН наконт справы зняволенага філосафа Мацкевіча. У падтрымку галадоўніка выказаўся Павел Латушка.
З Алімпійскіх гульняў няма добрых навінаў ад беларускіх спартоўцаў: без медалёў у біятлоне, правал у каньках. Дыктатар абвясціў датэрміновыя прэзідэнцкія выбары, але ў Туркменістане.
АА belsat.eu