Галоўнага лекара беларускіх санаторыяў у Літве і Сочы падазраюць у «дзяржаўнай здрадзе»
У Менскім гарадскім судзе 16 жніўня пачнецца закрыты суд над былым галоўным лекарам беларускіх санаторыяў за мяжой Андрэем Кобелем. Яго абвінавачваюць у «здрадзе дзяржаве», пазначана ў раскладзе суда.
Андрэй Кобель 10 гадоў быў галоўным лекарам санаторыю «Беларусь» у літоўскім Друскінінкаі, потым працаваў у Расеі і кіраваў аддзелам РНПЦ у Менску. Цяпер яго абвінавачваюць у шпіянажы на карысць Літвы.
Узімку прапагандысты паказалі фільм, у якім распавялі, што Андрэя Кобеля нібыта шантажавалі літоўцы. У стужцы гаворыцца, што галоўнага лекара нібыта завербавалі літоўскія спецслужбы пад пагрозай шантажу і патрабавалі збіраць і перадаваць інфармацыю аб адпачывальніках санаторыяў, а таксама звесткі аб рэзідэнцыі Аляксандра Лукашэнкі ў Сочы, якая размяшчаецца на тэрыторыі санаторыю.
Быццам бы ён атрымаў за інфармацыю некалькі сотняў еўраў. Таксама сцвярджалася, што Кобель уладкоўваў на працу супрацоўнікаў на патрабаванне Дэпартаменту дзяржбяспекі Літвы.
Алена Рувіна belsat.eu
