Праваабаронцы прызналі палітвязнямі яшчэ 7 асобаў. Цяпер палітычных зняволеных у Беларусі, паводле цэнтру «Вясна», – 1201.
Праваабаронцы прызналі палітвязнямі 7 асобаў. Гэта Карына Фасевіч, Дзмітрый Руткевіч, Павел Баркун, Захар Шарко, Яўген Мілянкевіч і Аляксандр Шэлепень – фігуранты справаў, заведзеных паводле «народнага» артыкула аб групавых дзеяннях, што груба парушаюць грамадскі парадак, а таксама Аляксей Шпакоўскі, абвінавачаны ў «масавых беспарадках».
Паводле цэнтру «Вясна», цяпер у Беларусі 1201 палітвязень, паводле ініцыятывы «Dissidentby», – 1331.
Праваабаронцы «Вясны» паведамляюць, што ў Беларусі цягам апошніх трох месяцаў працягваюцца затрыманні ў справе «Беларускага Гаюна». Людзей абвінавачваюць у «садзейнічанні экстрэмісцкай дзейнасці». Гэтая падстава сталася магчымай праз тое, што праект прызнаны «экстрэмісцкім фармаваннем».
Нагода для пераследу – дасланыя праз Telegram-бота фота і відэа з расейскімі вайскоўцамі і тэхнікаю ў Беларусі.
«Затрыманні адбыліся ў Менскім, Берасцейскім і Гомельскім раёнах. Вядома, што адвакаты некаторых затрыманых – пад падпіскаю аб неразгалошванні, таму падрабязнасцяў справы няма», – піша «Вясна».
Праваабаронцы адзначаюць, што затрыманых можа быць істотна больш, але з увагі на запалоханасць грамадства і пагрозы з боку сілавікоў не пра ўсе выпадкі становіцца вядома.
Тым часам у Рэчыцы, як паведамляе «Флагшток», схапілі адміністратара чату ў Viber пра дарожную абстаноўку ў Рэчыцы і Гомлі. Работніка «Беларуснафты» Аляксандра Гардзіенку затрымалі напрыканцы сакавіка.
«ГУБАЗіК з дому забіраў жорстка. „Шыюць“ 361-ы артыкул за фота расейскай тэхнікі, зробленыя ў 2022 годзе», – кажа крыніца выдання.
Імаверна, справа датычыць акурат «Беларускага Гаюна».
Генпракуратура паведаміла пра пераслед 22-гадовага жыхара Берасця, якога абвінавачваюць ва «ўдзеле ў экстрэмісцкім фармаванні», «фінансаванні тэрарыстычнай дзейнасці», «закліках да санкцыяў» і «абразе Лукашэнкі».
Маладзён нібыта дзевяць разоў заданаціў палку Каліноўскага, а «абразлівыя» каментары на адрас Лукашэнкі, а таксама «заклікі да санкцыяў» пакідаў у Telegram-чатах.
Міністэрства інфармацыі абнавіла пералік «экстрэмісцкіх матэрыялаў», заўважыла Беларуская асацыяцыя журналістаў. Туды залучылі YouTube-канал «Беларусь Новости», на які падпісаныя больш за 60 тысячаў карыстальнікаў.
У спісе цяпер таксама:
- акаўнт у TikTok «Республика Беларусь Новости», які не абнаўляецца з 2022 года;
- акаўнт у TikTok «Беларуская крыніца»;
- старонка ў Instagram Арцёма Брухана з Народнага антыкрызіснага ўпраўлення.
Сцяпан Кубік belsat.eu
