Пачатак перамоваў 15 траўня ў турэцкім Стамбуле паміж Расеяй і Украінай, дзе, як чакаецца, можа абмяркоўвацца замірэнне на фронце, зацягваюцца. А тым часам у МЗС РФ кажуць, што не зацікаўленыя ў замірэнні. Прэзідэнт жа ЗША сітуацыяй не засмучаны.
Прэзідэнт Украіны Уладзімір Зяленскі на брыфінгу пасля сустрэчы з прэзідэнтам Турцыі Рэджэпам Эрдаганам у Анкары паведаміў, што ўкраінскую дэлегацыю на сумесных украінска-амерыканска-турэцка-расейскіх перамовах у Стамбуле ўзначаліць міністр абароны Украіны Рустэм Умераў, хоць расейскага міністра абароны там не будзе, перадае УНІАН.
,,«Сустрэча мусіць быць у фармаце турэцкай, амерыканскай, украінскай і расейскай прысутнасці – па-першае, пасада нашага міністра абароны, па-другое, ён уваходзіць у склад групы нашых перамоўнікаў, а па-трэцяе, міністр абароны Украіны Рустэм Умераў вольна валодае турэцкай, англійскай, расейскай і ўкраінскай мовамі», – сказаў Зяленскі.
Пры гэтым ацэньваючы склад расейскай дэлегацыі, ён заявіў, што «яны, на жаль, вельмі несурʼёзна ставяцца да рэальных перамоваў». Паводле яго, сярод прысутных не відаць тых, хто сапраўды прымае пастановы, хоць менавіта Крэмль выступіў з прапановай перамоваў у Стамбуле. Зяленскі падкрэсліў, што тэмай нумар адзін падчас перамоваў будзе спыненне агню.
Лаўроў абражае Зяленскага
Тым часам міністр замежных справаў Расеі Сяргей Лаўроў на паседжанні дыпламатычнага клубу заявіў, што гарантыяў таго, што перамовы наконт Украіны пройдуць без праблемаў і гладка, няма. Паводле яго, замірэнне трэба для напампоўвання Украіны ўзбраеннем.
Патрабаванні ж Зяленскім прысутнасці ў Стамбуле Уладзіміра Пуціна, які сам і агучыў ідэю пра гэтыя перамовы, Лаўроў назваў крыкамі «ў мікрафон», а не рэальнай дыпламатыяй. Самога прэзідэнта Украіны ён назваў «вартым жалю чалавекам», якім нібы нехта «лялькаводзіць».
У цэлым кіраўнік МЗС РФ паўтарыў старыя патрабаванні Расеі, адзначыўшы, што задача РФ «не замірэнне ўзгадніць», а дамагчыся дэмантажу ўкраінскай дзяржаўнасці і спыніць збліжэнне Украіны з Захадам.
Рутэ: Падтрыманне Украіны – гарантыя міру
У сваю чаргу, генеральны сакратар NATO Марк Рутэ на прэс-канферэнцыі паводле вынікаў нефармальнай сустрэчы кіраўнікоў МЗС краінаў – чальцоў альянсу ў турэцкай Анталіі адзначыў, што менавіта заходняе падтрыманне Украіны ёсць «важным для забеспячэння трывалага міру». Ён падкрэсліў, што задача – дасягнуць трывалага і працяглага міру.
,,«І мяч цяпер, відавочна, на баку Расеі. Расейцы дасылаюць дэлегацыю нізкага ўзроўню цяпер і не выкарыстоўваюць магчымасць, створаную прэзідэнтам Зяленскім. Ён сказаў: "Я гатовы сесці з Пуціным. Як толькі будзе ўведзенае спыненне агню, мы гатовыя весці перамовы аб мірным пагадненні". Украіна, зразумела, гатовая ўступіць у гульню, але мяч на баку Расеі», – дадаў Рутэ.
Трамп не засмучаны і прапануе саступкі РФ
Прэзідэнт Злучаных Штатаў Амерыкі Доналд Трамп заявіў журналістам на борце самалёта «Air Force One», што ў кантэксце ўрэгулявання вайны Расеі супраць Украіны не адбудзецца нічога, пакуль ён асабіста не сустрэнецца з Пуціным. Але ў Стамбул ніхто з іх ляцець не захацеў.
Між тым «Bloomberg» са спасылкаю на ананімную крыніцу, знаёмую з хадой абмеркаванняў, піша, што ЗША прапанавалі РФ аднавіць працу Рады Расея – NATO ў абмен на спыненне агню ва Украіне. Паводле крыніцы, ЗША гатовыя пайсці і на іншыя саступкі Расеі дзеля таго, каб Пуцін пагадзіўся на 30-дзённае спыненне агню і замарожванне вайны на лініі фронту. Сярод такіх саступак – прызнанне Крыму расейскім і паслабленне санкцыяў супраць Масквы.
Адначасова амерыканскі бок дагэтуль не даў яснага адказу на пытанне, ці гатовы ён увесці новыя санкцыі супраць Расеі, калі атакі па Украіне працягнуцца.
Пуцін заклікаў Украіну на наўпроставыя перамовы 15 траўня ў Стамбуле. Прэзідэнт Украіны пагадзіўся – і сказаў, што будзе чакаць яго на перамовах. А Пуцін пастанавіў не ехаць. Познім вечарам напярэдадні перамоваў Крэмль апублікаваў склад дэлегацыі: кіруе ёй памочнік Пуціна, былы міністр культуры Уладзімір Мядзінскі, увайшлі ў дэлегацыю начальнік Галоўнага ўпраўлення Генеральнага штабу Узброеных сілаў Расеі, намеснікі міністраў абароны і замежных справаў, у дадатковых экспертах значацца тры намеснікі начальнікаў і адзін дырэктар дэпартаменту МЗС.
Ад Украіны ж будуць міністр замежных справаў Андрэй Сыбіга, міністр абароны Рустэм Умераў, мае быць кіраўнік Офісу прэзідэнта Андрэй Ермак ды іншыя. Зяленскі сам не збіраецца на перамовы, замест гэтага ён сустрэўся з кіраўніком Турцыі Рэджэпам Эрдаганам. У склад амерыканскай дэлегацыі, якая ўсё ж прыбыла на перамовы, увайшлі дзяржсакратар Маркаў Руб'ёў і дыпламаты высокага ўзроўню Стыў Ўіткаф і Кіт Келаг – усе цесна звязаныя з тэмаю перамоваў у справе Украіны.
Перамовы адклалі на другую палову дня 15 траўня. Але ТАСС не выключае іх пераносу на 16-га.
Якуб Хруст belsat.eu
