Трагічнае здарэнне ў Краснапольскім раёне Магілёўскай вобласці. Падчас прарэджвання лесу загінуў 35-гадовы дрывасек. Абставіны інцыдэнту будуць высвятляць следчыя.
Яшчэ адзін выпадак траўмавання падчас працы адбыўся ў пачатку траўня ў адным з аграпрадпрыемстваў Петрыкаўскага раёну на Гомельшчыне. Пра гэта нам стала вядома дзякуючы ініцыятыве «BELPOL». Паводле перададзеных дакументаў, ад удару маланкі пацярпеў жывёлавод. На інцыдэнт звярнулі ўвагу чыноўнікі з Гомельскага аблвыканкаму. Дзеля прафілактыкі вытворчага траўматызму яны запатрабавалі ад службоўцаў правесці з работнікамі навучанне і пазапланавы інструктаж у пытаннях аховы працы ды ўзмацніць кантроль за выкананнем патрабаванняў вытворчай дысцыпліны.
Дзяніс Садоўскі, Незалежны прафсаюзны рух:
«У Беларусі тэхніка бяспекі часта носіць фармальны характар і прысутнічае на прадпрыемствах, асабліва на небяспечных, толькі на паперы. Так, існуюць правяральныя структуры, але яны ў асноўным дзеюць выключна ў інтарэсах сістэмы і ніколі не выконваюць беспасярэдняй функцыі».
Агулам сельская гаспадарка па выніках 2024 года – адна з найбольш траўматычных сфераў, адзначылі ў Міністэрстве працы і сацыяльнай абароны. У антылідарах і будаўніцтва. За апошнія гады прынамсі шэраг выпадкаў гібелі працаўнікоў адбыліся на пляцоўках «Менск-Свету». Адзін з іх – сёлета ў студзені, калі загінуў 41-гадовы мантажнік. Мужчына ўпаў на зямлю з вышыні дзявятага паверху. Як апынулася, падчас працы ён не выкарыстоўваў ахоўнага рыштунку.
,,У шэрагі траўманебяспечных сфераў уваходзіць і прамысловасць. Бадай адным з самых гучных выпадкаў у гэтай галіне за апошнія гады стаўся выбух на Светлагорскім цэлюлозна-кардонным камбінаце ў чэрвені 2023-га. Тады загінулі тры працаўнікі, якія хімічна чысцілі сасуд пад высокім ціскам.
«Пры выкананні работаў адбылася самаадвольная ланцуговая экзатэрмічная рэакцыя, што справакавала выбух, магутнасцю амаль 680 кг у тратылавым эквіваленце. Кіраўнік цэху дакладна ведаў, што прамыванне падагравальніка перакісам вадароду не прадугледжана тэхнічнай дакументацыяй, аднак з мэтай эканоміі часу ён даручыў рабочым выканаць дадзеную працэдуру», – паведамілі ў Следчым камітэце Беларусі.
Летась кіраўніку цэху прысудзілі 5 гадоў зняволення і Br 560 тысячаў кампенсацыі маральнай шкоды на карысць пацярпелых.
Кожны выпадак расследуецца Дэпартаментам дзяржаўнай інспекцыі працы. Калі ў выніку ўдаецца даказаць віну наймальніка, сямʼя загінулага можа разлічваць на матэрыяльную дапамогу памерам 10 сярэднегадавых заробкаў. Выключэнні – калі працаўнік падчас інцыдэнту быў нецвярозы або калі ў арганізацыі няма прафсаюзнай ячэйкі.
Дзяніс Садоўскі, незалежны прафсаюзны рух
«Улады і кіраўніцтва прадпрыемства часта знаходзяць фармальныя падставы, каб не выплачваць работніку ніякіх кампенсацыяў пры ягонай гібелі, і ў такіх выпадках сямʼя загінулага застаецца сам-насам з праблемаю. І гэта паўсюдная сітуацыя на ўсіх прадпрыемствах».
Агулам у 2024 годзе ў Беларусі на вытворчасці загінулі 105 чалавек. І як адзначылі ў Міністэрства працы, гэта гістарычны мінімум за ўсе гады існавання Рэспублікі Беларусь.
Ірына Юрʼева belsat.eu
