23 красавіка Сенат Польшчы прыняў Закон аб змене некаторых законаў з мэтаю ліквідацыі парушэнняў у візавай сістэме Рэспублікі Польшча, што ўводзіць новыя абмежаванні для замежных студэнтаў. «Белсат» і юрыстка ў іміграцыйным праве Дар'я Грышановіч апавядаюць, што зменіцца для беларусаў у Польшчы з яго ўвядзеннем.
Увялі абмежаванне на колькасць замежнікаў у ВНУ
Колькасць замежных студэнтаў, якія навучаюцца ў ВНУ на працягу навучальнага года, не зможа перавышаць 50 % ад агульнай колькасці студэнтаў установы. Калі там ужо больш за 50 % замежных студэнтаў, ВНУ не можа прымаць новых замежнікаў, пакуль адсотак студэнтаў з-за мяжы не будзе меншы за 50 %.
Немагчыма будзе атрымаць працоўнага ВНЖ падчас навучання
Са спісу замежнікаў, якія маюць права на ВНЖ праз працу, выключылі:
- уладальнікаў студэнцкіх візаў;
- уладальнікаў візаў, выдадзеных іншымі краінамі Шэнгенскага пагаднення;
- замежнікаў з ВНЖ іншых краінаў Шэнгенскага пагаднення.
Гэта азначае, што абмінуць этап атрымання студэнцкага ВНЖ не ўдасца бальшыні навучэнцаў. Праблема ў тым, што студэнцкі ВНЖ (першы) выдаецца на тэрмін да 15 месяцаў, а для далейшага атрымання сталага залічваецца толькі палова гэтага тэрміну. Раней гэтае правіла асноўная частка студэнтаў абыходзіла: студэнт падчас навучання ўладкоўваўся на працу, а потым атрымліваў працоўны ВНЖ, увесь перыяд дзеяння якога ўлічваўся пасля пры атрыманні сталага.
,,Паводле новага закону, уладальнікі студэнцкіх візаў усё яшчэ могуць разлічваць на падачу заявы на блакітную картку ЕЗ (Blue card). Але цяжка ўявіць студэнта, які будзе адпавядаць усім крытэрам для атрымання такой карткі (працоўны кантракт мінімум на год і заробак не менш за 12 300 злотых за месяц).
Паліцэальная школа не пацвердзіць ведання польскай мовы, а запатрабуе яе для паступлення
Дасюль адным з папулярных спосабаў пацвердзіць веданне польскай мовы пры падачы на грамадзянства і на карту рэзідэнта ЕЗ было заканчэнне паліцэальнай школы (сярэдняя спецыяльная навучальная ўстанова, аналаг каледжу або тэхнікуму). Але новы закон гэтае права адмяняе: пасведчанне аб заканчэнні паліцэальнай школы больш не будзе пацвярджаць ведання польскай мовы на ўзроўні В1 пры падачы на грамадзянства Польшчы і карту рэзідэнта ЕЗ, як гэта было раней. Цяпер пацвердзіць веданне мовы давядзецца адмысловым дзяржаўным іспытам альбо скончыць польскую ВНУ ці школу.
Выключэнне прадугледжанае толькі для тых, хто скончыць паліцэальную школу да 30 чэрвеня 2025 года і падасць заяву на грамадзянства да 30 чэрвеня 2026-га.
Акрамя таго, з 1 верасня 2025 года для паступлення ў паліцэальную школу ў замежніка запатрабуюць веданне мовы на ўзроўні не ніжэй за В1. Раней такога правіла не было.
,,Зрэшты, адна перавага паліцэальнай школы застаецца без зменаў: яе заканчэнне дае свабодны доступ да рынку працы. Выпускніку не трэба будзе атрымліваць асобнага дазволу на працу ў Польшчы.
Спікер Сейму перадасць закон на подпіс прэзідэнту. Калі той яго падпіша да 16 траўня, змены набудуць моц 1 чэрвеня. Калі падпіша пазней, то не раней за 1 ліпеня.
Нагадаем, што раней «Белсат» цікавіўся ў Консульскім дэпартаменце МЗС Польшчы, ці шмат было выпадкаў, калі замежнікі пасля заканчэння паліцэальнай школы не ведалі польскай мовы на ўзроўні B1.
«Гэтае змяненне ёсць вынікам каментароў у межах міжміністэрскіх пагадненняў на запыт міністра адукацыі, які ўказаў, што паліцэальная школа – гэта сярэдняя школа, у якой праводзяцца заняткі толькі ў сферы прафесійнай адукацыі, але агульнай адукацыі, у тым ліку вывучэння польскай мовы, не прадугледжанае. Прымаючы пад увагу, што замежнікі (з сярэдняй адукацыяй), якія не валодаюць польскаю моваю, могуць быць прынятыя ў паліцэальную школу і навучанне ў школе такога тыпу доўжыцца ад года да 2,5 года ў залежнасці ад прафесіі, гэтага недастаткова, каб пасведчанне пра заканчэнне паліцэальнай школы пацвярджала веданне польскай мовы», – адказалі ў консульскім Дэпартаменце МЗС.
Тэса Анейда / ІР belsat.eu
