У Менскім гарадскім судзе агучылі прысуды ў справе атрымання дапамогі ад фондаў салідарнасці з палітвязнямі. Трое фігурантаў атрымалі ад 2 да 5 гадоў калоніі. Пра гэта – у чарговым аглядзе рэпрэсіяў, што не спыняюцца ў Беларусі пяты год.
Аблавы на сваякоў палітвязняў і былых палітычных зняволеных адбыліся летась. Нагодаю была дапамога, якую яны атрымоўвалі з-за мяжы ад фондаў салідарнасці. Пераслед тады зазнала мінімальна 51 асоба. Людзей штрафавалі, ім давалі содні. Былі заведзеныя крымінальныя справы.
«Dissidentby» паведамляе, што 12 чэрвеня ў Менскім гарадскім судзе агучылі прысуды тром асобам. Любоў Драгель атрымала 3 гады пазбаўлення волі, Аляксандр Якушкоў – 2 гады калоніі, Яўген Бойка – 5 гадоў. Бойка – ва ўмовах узмоцненага рэжыму.
Які артыкул ім паставілі ў віну, не ўдакладняецца.
Праваабарончы цэнтр «Вясна» даведаўся, што ў бліжэйшы час пачнуцца першыя працэсы ў справе перадавання інфармацыі маніторынгаваму праекту «Беларускі Гаюн». Вядома мінімальна пра 20 фігурантаў, бальшыня з іх – мужчыны. Іх абвінавачваюць у «садзейнічанні экстрэмісцкай дзейнасці». Паводле «Вясны», затрыманні тых, хто пісаў у чат-бот «Гаюна», працягваюцца.
Актывістка Ніна Багінская абскардзіла пастанову суда наконт знішчэння прадметаў з нацыянальнай сімволікаю, што міліцыянты забралі ў яе цягам мінулага года. Пра гэта паведамілі крыніцы «Белсату». Багінская ў сваёй заяве запатрабавала вярнуць ёй значкі і сцяжкі, якія яна зрабіла сваймі рукамі. Пагатоў міліцыянты забіралі іх у яе без афармлення.
Спадарыня Ніна ўказала, што нацыянальныя сімвалы ёсць гістарычнай каштоўнасцю, а ў дадзеным выпадку яшчэ і ейнай творчай уласнасцю.
Сілавікі ўчынілі вобшук у менскай кватэры старшыні зліквідаванай уладамі Беларускай сацыял-дэмакратычнай партыі (Грамада) Ігара Барысава. Нагодаю сталася крымінальная справа, заведзеная супраць палітыка. Які там артыкул, невядома, але, імаверна, пераслед звязаны з статусам «экстрэмісцкага фармавання» зліквідаванай партыі.
Суд у Маскве арыштаваў дырэктара менскай кампаніі «Авіяцыйная мануфактура» Валерыя Зязюліна. Бізнесоўца абвінавачваюць у «незаконным экспарце ўзбраенняў з Расеі», піша «Медиазона». Гэты артыкул прадугледжвае да 7 гадоў зняволення. Падрабязнасці справы невядомыя.
Лукашэнка ўхваляе палову хадайніцтваў аб памілаванні, паведаміла намесніца ягонай адміністрацыі Вольга Чупрыс. Паводле яе, штогод цяпер разглядаецца каля 500 матэрыялаў. Да 2023 года Лукашэнка пагаджаўся толькі ў 10,5 % выпадкаў, а летась падтрымаў 65 % хадайніцтваў. Сёлета – каля паловы.
У пералік «экстрэмісцкіх матэрыялаў» залучылі старонку ў Instagram «nadzeya_grodno», на якую падпісаныя 295 карыстальнікаў, а таксама TikTok-акаўнт «Жыве Беларусь» з 61 падпісантам.
Сцяпан Кубік belsat.eu
