У ноч на 13 чэрвеня Ізраіль нанёс серыю ўдараў па Іране. У Ізраілі атаку тлумачаць тым, што Іран наблізіўся да атрымання ядравай зброі. Корпус вартаўнікоў Ісламскай рэвалюцыі паведаміў пра смерць свайго лідара.
Вайскова-паветраныя сілы Ізраілю нанеслі ўдары па шэрагу аб’ектаў у Іране 13 чэрвеня а 3:00, піша Бі-Бі-Сі. Армія абароны Ізраілю патлумачыла, што Іран быў «як ніколі блізкі да атрымання ядравай зброі». Міністр абароны Ізраілю Ісраэль Кац назваў гэта апераджальным ударам і абвясціў надзвычайнае становішча ў звязку з магчымым ударам у адказ.
Іран пасля атакі запусціў больш за сотню дронаў у бок Ізраілю, паведамілі ізраільскія Сілы абароны. Дроны будуць ляцець некалькі гадзінаў, Ізраіль рыхтуецца іх збіць. Іранскія вайскоўцы абяцалі, што Ізраіль «заплаціць высокую цану», а вярхоўны лідар Алі Хамэнэі казаў, што Іран адкажа «жорсткім пакараннем».
Абноўлена. Паветраную трывогу ў Ізраілі адмянілі ў 9:48 паводле ізраільскага і беларускага часу. Сілы абароны Ізраілю заявілі пра перахоп усіх іранскіх дронаў. Пра пашкоджанні ў выніку іранскага ўдару дронамі не паведамлялі.
Удары Ізраілю прыйшліся па заводах узбагачэння ўрану, ракетных базах, аб’ектах у Тэгеране, Ісфахане, Тэбрызе ды іншых гарадах. На кадрах з Ірану відаць, што ўдары прыйшліся ў тым ліку па жылых дамах у сталіцы. Інфармацыйнае агенцтва Ісламскай Рэспублікі паведаміла пра смерць у выніку ізраільскай атакі кіраўніка Корпусу вартавых ісламскай рэвалюцыі генерала Хусэйна Салямі, камандуючага ўзброенымі сіламі Ірану генерала Голям Алі Рашыда, яшчэ некалькіх вайскоўцаў і двух фізікаў-ядравікаў.
Прэм’ер-міністр Ізраілю Бэньямін Нэтаньягу выдаў відэазвароты на іўрыце і па-англійску. Ён расказаў, што аперацыя мела назву «Народ як леў» («עם כלביא») і была праведзеная, бо Іран назапасіў урану на дзевяць атамных бомбаў, а таксама меў намер вырабіць дзесяць тысячаў балістычных ракетаў за наступныя тры гады. Паводле Нэтаньягу, гэта быў «вызначальны момант у ізраільскай гісторыі». У англамоўным звароце Нэтаньягу падкрэсліў, што для ўладаў Ірану Ізраіль – гэта «малы сатана», а «вялікі сатана» – Злучаныя Штаты.
Паводле іранскіх вайскоўцаў, атака была ўчыненая пры падтрыманні ЗША. Дзяржаўны сакратар ЗША Марка Руб’ё заявіў, што Ізраіль праводзіў атаку без удзелу ЗША, але папярэдзіў, што атака будзе «неабходная для самаабароны». Прэзідэнт ЗША Доналд Трамп у дзень перад атакаю сказаў, што не хацеў, каб Ізраіль атакаваў Іран, бо трываюць перамовы наконт іранскай ядравай праграмы (наступны раўнд перамоваў між ЗША і Іранам планавалі на 15 чэрвеня).
Знішчэнне іранскіх ядравых і ракетных аб’ектаў можа заняць некалькі дзён, адзначалі ізраільскія вайскоўцы. Нэтаньягу ж казаў, што кампанія працягнецца «столькі, колькі спатрэбіцца».
Летась Іран двойчы наносіў ракетныя ўдары па Ізраілі. Першы леташні ўдар Ірану быў адказам на ізраільскі авіяўдар па будынку іранскага консульства ў Дамаску, у выніку якога загінулі сямёра чальцоў іранскага Корпусу вартаўнікоў Ісламскай рэвалюцыі, у тым ліку высокапастаўлены брыгадны генерал. Ізраіль вінаваціць Іран у падтрыманні антыізраільскіх проксі-сілаў: «Хамасу», «Хізбулы» і еменскіх хусітаў.
Алесь Наваборскі belsat.eu
