Старшыня Крычаўскага райвыканкаму заклікаў жыхароў і прадпрыемствы «скінуцца» на аўтобусныя прыпынкі, аднак відэа з адпаведным зваротам выдалілі з сацсетак, а чыноўнік узяў бальнічны. Пры гэтым, як даведаўся «Белсат», збору грошай «на добраўпарадкаванне» ўлады не спынілі.
Днямі крычаўская раёнка апублікавала ў TikTok зварот кіраўніка мясцовага выканкаму Аляксея Шарая, які заклікаў жыхароў, арганізацыі і прадпрыемствы даць грошай на «прыпыначныя павільёны новага тыпу грамадскага транспарту».
У публікацыі меўся банкаўскі рахунак для ахвяраванняў. А ў каментарах людзі абураліся: а дзе нашыя падаткі, чаму гэтыя павільёны не аплачваюцца з бюджэту?
Пасля скандалу відэа выдалілі.
У Крычаўскім райвыканкаме карэспандэнту «Белсату» як прыватнай асобе прызналіся, што збор грошай працягваецца, і прадыктавалі банкаўскія рэквізіты:
«Грошы збіраюць. "Камунальнік" збірае грошы. І адзначце, што гэта на прыпынкі. Усё добраахвотна, можна любую суму перавесці».
Чаму відэа з кіраўніком раёну выдалілі, у выканкаме не растлумачылі. Самога чыноўніка на працоўным месцы няма:
«Ён цяпер на бальнічным».
Дар'я Форман, Сцяпан Кубік belsat.eu
