Кіраўнік Нацыянальнага банку Раман Галоўчанка апавёў, што беларусы будуць патроху адвыкаць лічыць усё ў доларах, але прызнаўся, што буйныя пакупкі сам лічыць у гэтай валюце.
На думку Рамана Галоўчанкі, звычка лічыць арэнду за жытло, кошт адпачынку, машынаў і кватэраў ды іншага ў доларах у Беларусі можа быць абумоўленая тым, што Беларусь мяжуе з Еўропай. Ён адзначае, што ў Расеі людзі менш увагі звяртаюць на замежную валюту. Пры гэтым і Галоўчанка можа прыкінуць кошт якой-небудзь пакупкі ў доларах:
«Мы ў сям'і неяк ужо адышлі ад гэтага. Можа быць, нейкія буйныя рэчы калі ацэньваеш, нерухомасць ці яшчэ нешта. Звычка [лічыць у доларах. – Заўв. рэд.] захоўваецца».
Кіраўнік Нацыянальнага банку ўпэўнены, што праз «пэўны час» беларусы ўсё радзей будуць жыць з аглядкаю на чужую валюту. Тлумачыць гэта тым, што «мы ніяк не ўплываем на тое, што адбываецца, напрыклад, з амерыканскім доларам».
Разам з тым чыноўнік не згадвае, што, напрыклад, курс беларускага рубля паўтарае траекторыю расейскага праз моцную гандлёвую залежнасць.
Галоўчанка адзначае, што палітыка дэвалютызацыі ўжо прынесла свой плён:
«Факт таго, што людзі перакладаюць валютныя дэпазіты ў рублёвыя, шмат пра што кажа. Думаю, міне яшчэ трохі часу – і ментальнай прывязкі да замежнай валюты мы абавязкова пазбавімся».
Чыноўнік таксама не згадвае, што Беларусь застаецца пад санкцыямі ЕЗ, якія забараняюць паступленні еўра ў Беларусь. Увозіць дазваляецца толькі невялікія сумы для асабістых патрэбаў.
Таксама беларускія банкі бяруць значныя камісіі за абслугоўванне валютных рахункаў. Напрыклад, «Прыёрбанк» з 1 красавіка просіць за рахунак, на якім ад $ 30 тысячаў да $ 50 тысячаў штомесячную камісію 500 рублёў. Калі грошай больш, то і плата вышэйшая.
Арсен Рудэнка belsat.eu
