Менск прырасце на 4 млн м² жытла. Дамы пабудуюць у новым сталічным раёне Зялёны Бор за МКАДам. Тэрыторыя былых вайсковых палігонаў займае прыблізна 2,5 тыс. га. Там узвядуць сацыяльнае ды арэнднае жытло, а таксама жытло для шматдзетных семʼяў.
«Раней мы адпрацавалі там праекты будовы сетак, будаўніцтве жытла. Кіраўнік дзяржавы падтрымаў і даручыў унесці за найкарацейшыя тэрміны. Ужо адпрацаваны адпаведны нарматыўны дакумент, каб мы маглі пачаць працы», – паведаміў старшыня Менскага гарвыканкаму Уладзімір Кухараў.
Чыноўнік адзначыў, што такія глабальныя будаўнічыя пляцоўкі, як Каменная Горка, Брылевічы або Лошыца, больш недасяжныя. Ды агулам у Менску не засталося свабодных месцаў для новабудоўляў, канстатавалі раней у гарвыканкаме.
«Жылая забудова, якую выкарыстоўваюць улады Беларусі, – гэта аналаг савецкага мікрараёну. І таму там шчыльнасць дамоў вельмі малая. І даволі вялікая колькасць прасторы», – кажа аўтар каналу «Фактар горада» Данііл Аленіус.
Развязваюць праблему з будаўнічымі пляцоўкамі найперш за кошт зносу трухлявага жытла. Пад рэканструкцыю ўжо сёлета можа трапіць тэрыторыя ў межах вуліцаў Арлоўская, Шчадрына і Гая. Знос у найбліжэйшай перспектыве чакае і старую Грушаўку. Паводле новага праекту, са ўсяго колішняга прадмесця Менску можа застацца толькі векавы клён на вуліцы Разінскай. Аднак з прыбіраннем старога жытла ў Менску ёсць праблемы, патлумачылі мясцовыя ўлады.
«Мы абмежаваныя наяўнасцю памяшканняў, у якія павінныя перасяліць людзей. Калі раней быў задзел, база з 300–350 кватэраў, і іх у парадку неабходнасці давалі пры зносе трухлявага жытла, то цяпер вымушаныя спецыяльна ствараць гэтак званы падменны фонд на раней вызваленых пляцоўках», – тлумачыла старшыня Камітэту будаўніцтва і інвестыцыяў Менскага гарвыканкаму Ірына Гонтарава ў інтэрвʼю часопісу «Экономика Беларуси».
Яшчэ адзін варыянт – будаваць жытло па-за межамі Менску. Трымацца гэтага курсу чарговы раз загадаў Лукашэнка, прымаючы напярэдадні з дакладам старшыню гарвыканкаму Кухарава.
Што датычыць жытла, якое ўжо ўзводзяць у Менску, Лукашэнка даручыў Кухараву навесці парадак з даўгабудамі. Асаблівую ўвагу пры гэтым ён надаў комплексу «Менск-Свет» – маўляў, восем з трынаццаці «пратэрмінаваных» абʼектаў месцяцца там.
Крыніцы «Белсату» у кампаніі «Дана Гоўлдынгс» на ўмовах ананімнасці паведамілі, што жыллёвае будаўніцтва ў «Менску-Свеце» мае завяршыцца да чэрвеня 2025-га. У пачатку 2026-га, запэўніваюць у сталічным гарвыканкаме, там застанецца толькі шматфункцыйная і адміністрацыйная забудова. Але чаму ўзніклі праблемы з тэрмінамі здачы абʼектаў?
«Прычына нумар 1 – парушэнне шчыльнасці забудовы, шчыльнасці насельніцтва, што адпаведна вядзе да змяненняў праектных работ і тэрмінаў гэтых работ. Прычына нумар 2 – затрымка з плацяжамі. Чыннік нумар 3 – наяўнасць генпадрадчыкаў, пры прызначэнні якіх Менгарвыканкам нават не спраўдзіў іх фінансавыя здольнасці», – кажа былая дэпутатка Менскага гарсавету Вольга Цесакова.
Праблематычнае для Менску і пытанне парковак. Паводле Уладзіміра Кухарава, у сталіцы афіцыйна зарэгістраваныя 900 тысяч аўтаў і яшчэ каля двухсот тысячаў штодзень прыязджаюць у горад. Пры гэтым чыноўнік адзначыў, што мясцовыя ўлады актыўна інвестуюць у развіццё грамадскага транспарту.
У цэнтры Менску, дзе ўжо не засталося ўчасткаў для вольных паркінгаў, будуць уводзіцца дадатковыя месцы. Аднак за карыстанне імі кіроўцам давядзецца заплаціць.
Ірына Юрʼева belsat.eu
