У ноч на 31 траўня расейскія войскі абстралялі некалькі рэгіёнаў Украіны. Ёсць загінулыя і сур’ёзна пацярпелыя, сярод якіх – дзеці.
У выніку атакі КАБамі (кіраванымі авіяцыйнымі бомбамі) па жылой забудове ў вёсцы ў Запарожскай вобласці загінула 9-гадовая дзяўчынка. 16-гадовы хлопец быў сур’ёзна паранены – у яго шматлікія траўмы, якія скончыліся ампутацыяй, кантузія. Падлетак цяпер у рэанімацыі на штучнай вентыляцыі лёгкіх.
Цалкам зруйнаваны адзін дом, яшчэ некалькі жылых дамоў і гаспадарчых пабудоваў былі разбураныя выбуховаю хваляю.
Агулам за мінулыя содні расейскія войскі нанеслі 628 удараў па 24 населеных пунктах Запарожскай вобласці. З іх 40 – авіяцыйныя абстрэлы, 376 – атакі беспілотнікаў, 205 – артылерыйскія ўдары, 7 – абстрэлаў з рэактыўных сістэмаў залпавага агню.
Беспілотнікамі і ракетамі былі атакаваныя Харкаў і 10 паселішчаў Харкаўскай вобласці. Параненыя некалькі чалавек. Пашкоджаныя прыватныя дамы, шматпавярховікі, прадпрыемствы.
Пад абстрэл трапіў таксама Дняпроўскі раён Херсону, у выніку чаго загінулі тры асобы, сярод іх – 66-гадовы мужчына. 10 чалавек атрымалі раненні.
Уначы 24 траўня Расея запусціла па тэрыторыі Украіны 367 беспілотнікаў і ракетаў. Гэтую паветраную атаку назвалі самаю вялікаю з часу, як Пуцін пачаў поўнамаштабнае ўварванне ва Украіну ў 2022 годзе. Вядома аб прынамсі 12 загінулых.
Пасля гэтага, 26 траўня, прэзідэнт ЗША Доналд Трамп заявіў, што не задаволены дзеяннямі Уладзіміра Пуціна і напісаў у сваёй сацыяльнай сетцы Truth Social, што кіраўнік Расеі «зусім звар’яцеў».
Поўнамаштабная вайна ва Украіне трывае ўжо 1193 дні.
Марыя Міхалевіч belsat.eu
