Для абароны ўсходняй мяжы Польшча будуе новыя вайсковыя часткі на тэрыторыі памежных з Беларуссю і Расеяй ваяводстваў – Падляскага і Варміньска-Мазурскага.
Як паведамляе «TVP3 Olsztyn», у межах рэалізацыі абароннай дактрыны, што мусіць узмацніць усходні фланг NATO, у тым ліку сувальскі калідор, запланаванае будаванне вайсковых адзінак у Элку і Алецка (Варміньска-Мазурскае ваяводства), а таксама ў Граеве і Аўгуставе (Падляскае).
Адзначаецца, што ў полі пад Элкам ужо ідзе будаванне казарменнага комплексу, пакуль у выглядзе часовых кантэйнерных збудаванняў, на 700 вайскоўцаў выведнага батальёну 16-й Паморскай механізаванай дывізіі.
,,«Тут будзе развітая інфраструктура для размяшчэння вайскоўцаў і правядзення вучэнняў. Тут таксама будзе арганізаваная пляцоўка для трэнаванняў, а таксама паркоўка, захоўванне абсталявання і ўся лагістыка», – паведаміў падпалкоўнік Робэрт Хупка, кіраўнік 16-га выведнага батальёну ў Элку.
Аддзяленне ў стадыі фармавання. Працягваецца набор і рыхтаванне жаўнераў, якія папоўняць шэрагі выведнага батальёну.
«Служба ў выведным батальёне вельмі спецыфічная і вельмі патрабавальная. Жаўнеры, якія хочуць служыць у выведным батальёне, мусяць прадэманстраваць выключную псіхафізічную здольнасць», – адзначыла Магдалена Касьціньска, прадстаўніца 16-й Паморскай механізаванай дывізіі.
Сувальскі калідор – гэта вузкі 70-кіламетровы пас тэрыторыі ўздоўж літоўска-польскай мяжы, што аддзяляе Беларусь ад Калінінградскай вобласці. Праблема калідору пачала шырока абмяркоўвацца пасля 2014 года, калі анексія Крыму і канфлікт на Данбасе прымусілі NATO пераасэнсаваць расейскую пагрозу. У кантэксце гіпатэтычнай вайны з Расеяй сувальскі калідор пачаў успрымацца на Захадзе як найбольш слабое месца ў сістэме бяспекі Альянсу і найбольш імаверны пункт першага расейскага ўдару. То бок калі Масква наважыцца на вайну з NATO, то распачнецца канфлікт акурат у сувальскім калідоры. Пра гэтую пагрозу наступнымі гадамі не раз заяўлялі заходнія палітыкі, генералы і вайсковыя аналітыкі.
Стратэгічная значнасць сувальскага калідору палягае на тым, што захоп гэтай зоны дазволіць Расеі наладзіць сувязь са сваім калінінградскім анклавам і адначасова адсекчы Літву, Латвію і Эстонію ад іншых краінаў NATO. Перакідванне сілаў NATO праз Балтыйскае мора таксама можа стацца праблемаю, бо Расея будзе пагражаць марскім камунікацыям з Калінінградскай вобласці, дзе, у прыватнасці, размешчаныя ракетныя комплексы «Іскандэр». У выніку краіны Балтыі апынуцца ў ізаляцыі і ім давядзецца адбіваць расейскае ўварванне самастойна. А вайсковы патэнцыял Літвы, Латвіі і Эстоніі несупастаўляльны з вайсковым патэнцыялам РФ.
Якуб Хруст belsat.eu
