Амерыканскія і расейскія афіцыйныя асобы сустрэнуцца ў Саудаўскай Аравіі найбліжэйшымі днямі, каб распачаць перамовы, скіраваныя на спыненне вайны ва Украіне. Пра гэта паведамляе «Reuters» са спасылкаю на крыніцы, знаёмыя з планамі.
Прэзідэнт Украіны Уладзімір Зяленскі, які ў пятніцу сустрэўся з віцэ-прэзідэнтам ЗША Джэй Ды Вэнсам у Нямеччыне, заявіў, што Украіну не запрашалі на перамовы ў Саудаўскую Аравію, і Кіеў не будзе ўступаць у перамовы з Расеяй да кансультацыяў са стратэгічнымі партнёрамі.
Ад ЗША ў Саудаўскую Аравію паедуць дзяржсакратар ЗША Маркаў Руб'ёў, дарадца ў нацыянальнай бяспецы Майк Ўолц і пасланнік Белага дому на Блізкім Усходзе Стыў Ўіткоф, паведаміў «Reuters» чалец Палаты прадстаўнікоў ЗША Майкл Маккол.
У кулуарах Мюнхенскага форуму бяспекі Маккол заявіў, што мэта перамоваў – арганізаваць сустрэчу прэзідэнта ЗША Доналда Трампа, прэзідэнта Расеі Уладзіміра Пуціна і прэзідэнта Украіны Уладзіміра Зяленскага, «каб нарэшце ўсталяваць мір і скончыць з гэтым канфліктам».
Дасведчаная крыніца пацвердзіла, што ў Саудаўскай Аравіі запланаваныя перамовы паміж амерыканскімі і расейскімі афіцыйнымі асобамі.
На Мюнхенскім форуме Уладзімір Зяленскі заявіў, што не будзе сустракацца ні з кім з расейцаў, акрамя Пуціна.
Трамп, які ўступіў на пасаду 20 студзеня, неаднаразова даваў абяцанні пра хуткае спыненне вайны ва Украіне. У сераду ён асобна патэлефанаваў Пуціну і Зяленскаму, у выніку чаго еўрапейскія хаўруснікі Вашынгтону былі занепакоеныя тым, што яны будуць выключаныя з усякага мірнага працэсу.
Гэтыя асцярогі ў значнай ступені пацвердзіліся ў суботу. Пасланнік Трампа ў справах Украіны заявіў, што Еўропе не будзе месца за сталом перамоваў, пасля таго як Вашынгтон разаслаў у еўрапейскія сталіцы анкету з пытаннем пра тое, які ўнёсак яны могуць зрабіць у гарантаванне бяспекі для Кіева.
Арсен Рудэнка belsat.eu
