Суд Петрыкаўскага раёну задаволіў пазоў працаўніка мясцовага прадпрыемства меліяратыўных сістэмаў аб адмене дысцыплінарнага спагнання, піша «Флагшток» са спасылкай на прэс-службу Гомельскага абласнога суду.
Інцыдэнт на прадпрыемстве адбыўся ў лістападзе 2024 года, калі працаўнікі не здолелі да канца выканаць збор парубачных станкоў і іншую працу, бо спынілася тэхніка, якая была запраўленая недастатковай колькасцю паліва.
Пакаралі за гэта начальніка ўчастку, у чые абавязкі ўваходзіць арганізацыя працы на месцы, а не планаванне працаў.
Дакладную запіску на начальніка ўчастку напісаў галоўны інжынер прадпрыемства. Паводле яго, «уся тэхніка прастойвала, рабочыя не выконвалі працу, чакалі сканчэння працоўнага дня». На падставе запіскі дырэктар прыцягнуў начальніка ўчастку да дысцыплінарнага спагнання ў выглядзе заўвагі за «неналежнае выкананне сваіх працоўных абавязкаў».
Начальнік участку палічыў нават такое мяккае пакаранне цалкам несправядлівым, пайшоў даказваць, што праўда на ягоным баку, у суд, і ўрэшце перамог, хоць на гэта спатрэбілася некалькі месяцаў.
У пазове працаўнік прадпрыемства адзначыў, што планаваць працы павінны галоўны інжынер і дырэктар, бо менавіта яны накіроўваюць на ўчастак тэхніку, аднак «кіраўнік пасля прыбыцця на аб’ект мераў дзеля дастаўкі паліва не прыняў».
Петрыкаўскі раённы суд пастанавіў адмяніць дысцыплінарнае спагнанне. Рашэнне ўступіла ў законную сілу. «Флагшток» заўважае, што дзяржаўная газета Петрыкаўскага райвыканкаму пра перамогу рабочага ў судзе не паведаміла.
Марыя Міхалевіч belsat.eu
