Прэм’ер-міністр Польшчы Дональд Туск паведаміў пра значнае зніжэнне колькасці нерэгулярных мігрантаў, якія спрабуюць пранікнуць на тэрыторыю Польшчы з Беларусі.
Са словаў Туска, гэтага ўдалося дасягнуць дзякуючы ўзмацненню візавай палітыкі і часоваму прыпыненню права на атрыманне прытулку.
,,«Мы ўзмацнілі візавую палітыку і, галоўным чынам, прыпынілі дзеянне права на прытулак у тых месцах, дзе сутыкаемся з масавым перасячэннем мяжы, арганізаваным Беларуссю і Расеяй. Сёння колькасць нелегальных мігрантаў, якія перасякаюць усходнюю мяжу Польшчы, зменшылася ў дзесяць разоў у параўнанні з сітуацыяй, якая была да ўвядзення гэтых абмежаванняў», – адзначыў у сваёй заяве Туск.
Нагадаем, што ў перыяд перад выбарамі ў Беларусі польскія памежнікі сапраўды пачалі фіксаваць нашмат менш выпадкаў перасячэння мяжы. Гэтак, 13 студзеня 2025 года, а перад гэтым – 9 студзеня, польская Памежная ахова не зафіксавала ніводнай спробы незаконнага мінання мяжы. 7 і 8 студзеня мігранты спрабавалі трапіць на тэрыторыю Польшчы менш за 10 разоў на дзень.
«BYPOL» паведамляў, што большую частку мігрантаў вывезлі з заходніх рэгіёнаў Беларусі яшчэ ўвосень 2024 года «з мэтай недапушчэння дэстабілізацыі абстаноўкі ў краіне падчас правядзення прэзідэнцкіх выбараў у студзені 2025 года».
У 2024 годзе польскія памежнікі зафіксавалі 30 тысячаў спробаў незаконнага перасячэння мяжы, у 2023 годзе – 26 тысячаў.
10 снежня 2024 года Польшча працягнула дзеянне буфернай зоны, уведзенай на мяжы з Беларуссю 13 чэрвеня летась, яшчэ на 90 дзён. Польскі МУС сцвярджае, што буферная зона магла паспрыяць зніжэнню аб’ёмаў нелегальнай міграцыі.
Крызіс на заходніх межах Беларусі трывае з вясны 2021 года. Менавіта тады, у адказ на санкцыі Еўразвязу, улады Беларусі пачалі выкарыстоўваць мігрантаў для атакі межаў заходніх суседзяў. Краіны ЕЗ назвалі такія дзеянні гібрыднай агрэсіяй.
Раман Шавель belsat.eu
