Рада Міжнароднай асацыяцыі лёгкаатлетычных федэрацыяў не стала касаваць забароны на ўдзел беларускіх і расейскіх спартоўцаў у спаборніцтвах. Падобна, гэтую пастанову пераглядзяць толькі пасля сканчэння вайны ва Украіне.
«Існыя санкцыі адэкватныя і не патрабуюць замены, дапаўненняў або змяненняў, калі цяперашняя сітуацыя істотна не пагоршыцца або не будзе заключанае мірнае пагадненне», – заявіў кіраўнік Міжнароднай асацыяцыі лёгкаатлетычных федэрацыяў Сэбэст’ян Коў.
Такім чынам, была працягнутая забарона на ўдзел беларускіх і расейскіх спартоўцаў у міжнародных спаборніцтвах, уведзеная пасля пачатку поўнамаштабнай вайны ва Украіне.
У лютым Міжнародная федэрацыя хакею таксама працягнула адхіленне зборных Беларусі і Расеі яшчэ на год. Арганізацыя пастанавіла, што рэінтэграцыя нацыянальных і клубных камандаў дзвюх краінаў у чэмпіянаты сезону 2025–2026 гадоў пакуль небяспечная.
Сцяпан Кубік belsat.eu
