Цырымонія ўзнагароджання шэрагу выбітных асобаў адбылася ў Офісе абранай прэзідэнткі ў Вільні. «Гэтыя ўзнагароды – сімвал удзячнасці і прызнання кожнаму і кожнай, хто працягвае змагацца, нягледзячы ні на што», – заявіла Святлана Ціханоўская.
Спіс узнагароджаных асобаў Аб'яднаны пераходны кабінет, які ачольвае Святлана Ціханоўская, апублікаваў 22 сакавіка. Сёння, у Дзень Волі, лідарка ўручыла ўзнагароды ў сваім Офісе ў Вільні.
Медаль «За плённую працу на карысць Беларусі» за адданасць інтарэсам беларускага народу і значны ўнёсак у развіццё беларускай дэмакратыі і грамадзянскай супольнасці, паслядоўнае адстойванне інтарэсаў дэмакратычнай Беларусі атрымаў літоўскі палітолаг, выкладчык, кіраўнік літоўскага офісу «Freedom House» Віціс Юрконіс.
Беларускі журналіст, літаратар, крытык і выдавец Сяргей Дубавец атрымаў Крыж Адраджэння Беларусі за шматгадовую працу і значны ўнёсак у нацыянальнае адраджэнне.
Акрамя таго, некалькі асобаў былі ўзнагароджаныя непублічна, паведамляе Telegram-канал абранай прэзідэнткі.
«Гэтыя ўзнагароды – сімвал удзячнасці і прызнання кожнаму і кожнай, хто працягвае змагацца, нягледзячы ні на што. Гэтыя выбітныя людзі робяць Беларусь мацнейшаю і бліжэйшаю да свабоды. Іхная адданасць натхняе і дае надзею. Гэта гонар – быць побач з такімі беларусамі», – заявіла Ціханоўская.
Паводле пастановы Пераходнага кабінету, медалём «За плённую працу на карысць Беларусі» за выбітныя дасягненні ў прафесійнай і грамадскай дзейнасці таксама былі ўзнагароджаныя:
- польскі палітолаг і праваабаронца, былы кіраўнік Усходнееўрапейскага дэмакратычнага цэнтру Павэл Казанэцкі;
- журналіст і радыёвядоўца Зміцер Лукашук;
- IT-эксперт, прадпрымальнік, заснавальнік шэрагу грамадскіх ініцыятываў у лічбавай сферы Павел Лібер.
Медалём Францыска Скарыны за высокія дасягненні ў сваёй дзейнасці ўзнагародзілі музыку Лявона Вольскага.
Медаль Няскораных (Ларысы Геніюш) за стойкасць і годнасць, праяўленыя ў зняволенні, атрымала журналістка, былая працаўніца Белтэлерадыёкампаніі Ксенія Луцкіна.
Юрыст, палкоўнік юстыцыі ў адстаўцы Аляксандр Варапаеў быў узнагароджаны медалём «Гонар і годнасць» за рызыку жыццём у змаганні за свабоду, нацыянальныя каштоўнасці, дэмакратыю і правы чалавека.
Сёння ж пра свае ўзнагароды абвесціла Рада Беларускай Народнай Рэспублікі. Адпаведныя дэкрэты падпісала старшыня Рады БНР Івонка Сурвіла.
Ордэнам Жалезнага рыцара пасмяротна ўзнагародзілі добраахвотніцу Марыю Зайцаву «за асабісты гераізм, выяўлены ў змаганні з расейскімі агрэсарамі за волю народаў Украіны і Беларусі».
Ордэн Пагоні атрымалі:
- ксёндз Вячаслаў Барок, які «ў барацьбе дабра са злом застаўся на баку сваіх вернікаў, якія прагнулі свабоды»;
- стваральніца і кіраўніца рэабілітацыйнага цэнтру «Ланка» Таццяна Гацура-Яворская, якая ўратавала жыцці сотняў добраахвотнікаў ва Украіне;
- журналіст, былы палітычны вязень Алег Груздзіловіч, які «вызначаўся сваёй адданасцю нацыянальнаму Адраджэнню яшчэ ў пачатку 1990-х гадоў і застаўся верным прынцыпам свабоды слова»;
- кіраўніца Офісу дэмакратычных сілаў Беларусі ў Празе Крысціна Шыянок, якая дапамагала эвакуацыі і лячэнню ў Чэхіі параненых падчас пратэстаў, а таксама беларускіх медыкаў, пацярпелых ад рэпрэсіяў.
Сцяпан Кубік belsat.eu
