У Дзень Волі сілавікі схапілі некалькі асобаў, нібыта датычных да праекту «Беларускі Гаюн», паведамляюць праваабаронцы. Сайт і сацсеткі коміка Славы Камісаранкі прызнаныя экстрэмісцкімі. Хронікі палітычнага пераследу – у чарговым аглядзе «Белсату».
Праваабарончы цэнтр «Вясна» паведаміў, што 25 сакавіка ў Беларусі затрымалі некалькі асобаў паводле палітычных справаў. Паводле папярэдніх звестак, ідзецца пра пераслед людзей, нібыта датычных да праекту «Беларускі Гаюн». Дакладны лік затрыманых і якія крымінальныя артыкулы ім ставяць у віну, пакуль не вядома.
«Беларускі Гаюн» – маніторынгавы праект, публікаваў інфармацыю пра перасоўванне вайсковай тэхнікі, палёты беспілотнікаў над Беларуссю ды іншыя звесткі, што датычаць войска і вайны ва Украіне. У лютым невядомыя трапілі ў Telegram-чат, куды бот для зваротнай сувязі перасылаў паведамленні інфарматараў. Пасля гэтага сілавікі заявілі пра затрыманне мужчыны, які нібыта дасылаў дадзеныя «Гаюну». Неўзабаве заснавальнік праекту Антон Матолька абвесціў пра спыненне працы рэсурсу.
Медыя «Ynet» з Ізраілю паведаміла пра катаванні грамадзяніна гэтай краіны ў Беларусі. Мужчыну схапілі, калі ён прыехаў з жонкаю і дзецьмі. Паводле сям'і, яго галадзілі, білі электрычным токам. Фармальнай падставаю для затрымання сталася падпіска на «экстрэмісцкі кантэнт» – ідзецца пра суполку ў Facebook, дзе абмяркоўвалася жыццё ў Ізраілі і Беларусі.
Родныя мяркуюць, што насамрэч мужчыну схапілі за ўдзел ягонага сына ў акцыі ў Ізраілі ў падтрыманне дэмакратычных сілаў. З увагі на тое, што сілавікі забралі ў затрыманага дакументы, яму давялося афармляць неабходныя паперы ў ізраільскай амбасадзе ў Менску, каб выехаць. Мужчына ўжо вярнуўся ў Ізраіль пасля 15 содняў арышту.
Ягоны сын расказаў, што звяртаўся па дапамогу ў МЗС Ізраілю і амбасаду ў Беларусі, але «атрымаў уніклівыя адказы». Мужчына ад перажытага стрэсу яшчэ не ачуняў.
Актывіст польскай меншасці і журналіст Анджэй Пачобут за кратамі ўжо 4 гады. Яго затрымалі на Дзень Волі ў 2021 годзе. У лютым 2023-га суддзя Дзмітрый Бубенчык агучыў вырак: 8 гадоў калоніі ўзмоцненага рэжыму. Ён прызнаў Пачобута вінаватым у «распальванні варожасці» і «закліках да дзеянняў на шкоду Беларусі».
Суд Ленінскага раёну ў Магілёве прызнаў «экстрэмісцкімі» сайт коміка Славы Камісаранкі, а таксама акаўнты ў Instagram і YouTube. Раней яго завочна судзілі і прызначылі 6 гадоў калоніі, а пасля дадалі ў спіс «тэрарыстаў і экстрэмістаў», нагадвае «Вясна».
Яшчэ адно папаўненне ў пераліку «экстрэмісцкіх матэрыялаў» – кніга пра Аляксандра Лукашэнку «Выпадковы прэзідэнт». Такі статус твору журналістаў Паўла Шарамета і Святланы Калінкінай надаў суд Цэнтральнага раёну Менску 18 сакавіка.
Сцяпан Кубік belsat.eu
